Cefnogi busnesau lleol

Gwyddom y gall troseddu fod yn drychinebus i fusnesau o bob maint. Nid ydym eisiau iddo ddigwydd i chi, felly byddwn yn eich cefnogi yn y ffyrdd canlynol:

• os ydych wedi dioddef trosedd, byddwn yn eich cefnogi chi a busnesau cyfagos i wella mesurau diogelwch

• byddwn yn ymweld â busnesau lleol ledled y rhanbarth i roi cyngor ar sut i gadw eich eiddo a'ch busnes yn ddiogel

• byddwn yn eich gwahodd i ymuno â’n dull gweithredu partneriaeth 'Dangos y Drws i Drosedd’

• byddwn yn eich cynghori ar ddefnyddio goleuadau a theledu cylch cyfyng i atal troseddwyr

• byddwn yn rhoi arwyddion i chi eu harddangos, yn datgan y bydd eiddo a gynigir ar werth yn cael ei wirio

Os ydych chi'n fusnes sy'n masnachu nwyddau ail-law:

• byddwn yn rhoi tortsh UV am ddim i chi, i wirio a yw'r eiddo a gynigir ar werth wedi'i ddwyn

• byddwn yn rhannu manylion eiddo sydd wedi'i ddwyn â chi cyn gynted ag y gallwn

• byddwn yn gofyn i chi fod ein 'llygaid a chlustiau' ar y stryd

• byddwn yn eich helpu i adnabod arwyddion o gam-fanteisio troseddol, os gwelwch rai

• byddwn yn gofyn i chi ein ffonio ar unwaith os oes gennych unrhyw bryderon

• byddwn yn eich gwahodd i gofrestru ar gyfer porth Dangos y Drws i Drosedd.

Pam?

• mae'n llai tebygol y bydd troseddwyr yn targedu busnes sydd wedi'i ddiogelu'n dda

• bydd yn haws i fanwerthwyr adnabod eiddo sydd wedi'i ddwyn a rhwystro gwerthiant nwyddau sydd wedi'u dwyn

• bydd yn haws olrhain troseddwyr a’u cysylltu â throseddau penodol, a sicrhau euogfarn

• bydd yn haws dychwelyd eiddo wedi'i ddwyn i'w wir berchennog

• bydd troseddwyr yn ei chael hi'n anos cael gwared ar nwyddau sydd wedi'u dwyn ac i elwa arnynt

• bydd hyn yn helpu i atal troseddwyr gan na fydd troseddu'n cael ei wobrwyo

• bydd hyn yn lleihau achosion o droseddau meddiangar

• bydd hyn hefyd yn ein helpu i fynd i'r afael â throseddu cyfundrefnol difrifol, ac i ddiogelu pobl sy'n agored i gam-fanteisio troseddol.

Os oes gennych unrhyw amheuaeth o gwbl bod yr eitem wedi'i ddwyn, cysylltwch â ni a byddwn yn ymchwilio i hyn.

Rydym hefyd yn anfon rhybuddion am eiddo sydd wedi'i dwyn yn rheolaidd at fanwerthwyr i rannu manylion unrhyw eiddo sydd wedi'i ddwyn ac sydd yn cylchredeg.

Pan fyddwch yn cynnal trafodion gydag aelod o’r cyhoedd, cofiwch y canlynol:

• cadarnhewch fod gan y gwerthwr ddau ddull adnabod – y ddau ohonynt yn cynnwys llun a phrawf o’r cyfeiriad – a chofnodwch y manylion,

• gwnewch ymholiadau rhesymol am berchnogaeth yr eitem; er enghraifft ei hanes a’i darddiad

• byddwch yn ymwybodol o’r wybodaeth ddiweddaraf sy’n cael ei rhannu gan yr heddlu am eiddo wedi’i ddwyn sydd o gwmpas,

• gwiriwch bob eitem gyda’r dortsh uwchfioled a ddarparwyd.

Os oes gennych chi unrhyw amheuon am yr eitem neu’r gwerthwr, cysylltwch â ni ar 101.
Ffoniwch 999 bob tro os oes argyfwng.

Sut i Ddiogelu eich Tanwydd

Mae nifer o gamau y gallwch eu cymryd i leihau'r risg o ddioddef lladrad tanwydd. 

Mae’r rhain yn cynnwys:

Gosod goleuadau

Dylech osod goleuadau diogelwch i oleuo unrhyw weithgarwch amheus, ac os oes camerâu teledu cylch cyfyng (CCTV) wedi’u gosod ar y safle neu eiddo, dylai'r goleuo gael ei ddylunio i gyd-fynd â hynny ac ni ddylai achosi cysgodion na thaflu golau ar lens y camera a all atal neu gyfyngu ar y delweddau sy'n cael eu recordio.

Defnyddio dull monitro o bell

Mae CCTV sy’n gallu cael ei fonitro o bell yn rhwystr, a byddant yn helpu i ddiogelu ffermydd a safleoedd adeiladu. Oherwydd natur anghysbell rhai o'r safleoedd hyn a'r ardal ddaearyddol maen nhw’n ei gwasanaethu, dylai unrhyw systemau CCTV recordio ardaloedd risg uchel, fel tanciau tanwydd. Gall monitro o bell bob awr o’r dydd gan Ganolfan Derbyn Larwm (ARC) gadarnhau’r rheswm dros larwm sy’n seinio a nodi unrhyw weithgarwch amheus.

Ystyried defnyddio systemau CCTV symudol

Gallech ystyried defnyddio unedau CCTV symudol a system PIDS ar safleoedd bregus. Mae'r systemau hyn wedi'u cynllunio ar gyfer safleoedd adeiladu, ac fel unedau unigol - gellir eu gosod a’u defnyddio’n gyflym ac maent yn ddefnyddiol ar gyfer ardaloedd bregus. Gall y rhain anfon neges ar unwaith i reolwr y safle, yn ogystal â delwedd o ansawdd da o'r unigolyn sydd yng ngolwg y camera. Mae modd eu cysylltu â Chanolfan Derbyn Larwm hefyd i gadarnhau’r rheswm dros larwm sy’n seinio a nodi unrhyw weithgarwch amheus. Mae gan Diogelu drwy Ddylunio (SBD) sawl aelod sy'n arbenigo yn y maes hwn a gallan nhw roi cyngor i chi ar yr ateb gorau.

Gwirio ardal recordio CCTV

Gwnewch yn siŵr nad oes dim byd yn rhwystro’r camerâu CCTV sydd wedi’u gosod, neu nad yw’r ardal recordio wedi’i chyfyngu gan gerbydau mawr sydd wedi’u parcio ar y safle. Cyfrifoldeb rheolwr y safle ddylai hyn fod yn ystod y dydd, a dylai staff diogelwch wirio hyn pan fyddant yn dechrau eu sifftiau.

Rhaid cynnal a chadw tirlunio a llystyfiant a allai gyfyngu ar ardal recordio’r camerâu yn ystod y tymhorau tyfu, a'u tocio er mwyn sicrhau nad ydynt yn rhwystro’r camerâu.

Defnyddio arwyddion

Defnyddiwch arwyddion i dynnu sylw at y mesurau diogelwch rydych wedi'u gosod. Gall hyn helpu i atal troseddwyr sy’n cerdded drwy'r safle’n hamddenol i geisio cael gwell syniad o’r mesurau diogelwch. Gallai’r arwyddion yma gynnwys: Eiddo Preifat, Cadwch Allan, Camerâu CCTV ar waith, Caiff pob cerbyd ei adael heb lawer o danwydd, Patrolau diogelwch ar waith.

Diogelu a chloi

Dylech ddiogelu cerbydau a pheiriannau mewn cwrt neu gynhwysydd os yn bosib, a defnyddio capiau sy’n cloi ar danciau tanwydd a dyfeisiau gwrth-seiffon.

Defnyddio larymau

Defnyddiwch systemau larwm sy’n cael eu sbarduno gan dresmaswyr, a all fod â seinydd lleol neu sy’n anfon signalau sy'n cael eu monitro o bell.

I gael rhagor o wybodaeth am larymau, ewch i https://www.policesecuritysystems.com/

Defnyddio swyddogion diogelwch

Yn dibynnu ar y bygythiad a'r risg i'r safle cyfan, gall swyddogion diogelwch fod yn ddull ataliol gweladwy hynod effeithiol.

Dylai unrhyw gwmni sy'n darparu swyddogion diogelwch gael ei gymeradwyo gan Awdurdod y Diwydiant Diogelwch (SIA) o dan eu cynllun contractwyr cymeradwy.

Os oes gennych chi gwestiwn am Dangos y Drws i Drosedd neu drosedd meddiangar yng Ngwent:

Anfonwch e-bost atom

Os ydych am gysylltu â Heddlu Gwent ynghylch mater arall neu i riportio trosedd, gallwch anfon neges uniongyrchol atom ar gyfryngau cymdeithasol neu ffoniwch 101 neu 999 mewn argyfwng.