Twyll Rhamant

Mae twyll rhamant yn digwydd pan fydd twyllwyr yn defnyddio proffil ffug i gysylltu â rhywun ar gyfryngau cymdeithasol neu ap chwilio am gymar. Byddant yn dechrau perthynas gydag un pwrpas – i gael y dioddefwr i anfon arian atyn nhw.

Mae twyllwyr yn buddsoddi llawer o amser yn paratoi eu dioddefwyr er mwyn eu cael nhw i ymddiried ynddyn nhw a syrthio mewn cariad gyda nhw cyn gofyn iddyn nhw am arian.

Ydych chi wedi bod yn sgwrsio ar-lein gyda rhywun o’r lluoedd arfog, rhywun sy’n feddyg mewn gwlad dramor, sy’n gweithio ar rig olew, neu sydd wedi dweud eu bod nhw’n gweithio dramor ar hyn o bryd?

Ydyn nhw wedi gofyn i chi anfon arian atyn nhw, neu gael taleb iddyn nhw, am y rhesymau canlynol:

• dim mynediad at eu cyfrif banc oherwydd bod yr heddlu neu’r fyddin wedi ei feddiannu

• maen nhw angen arian i fynd adref

• maen nhw wedi cael eu harestio ar y ffordd i’r maes awyr

• maen nhw wedi bod mewn damwain ar y ffordd i’r maes awyr ac angen arian i dalu biliau meddygol.

Os ydych chi, mae’n bosibl eich bod chi wedi dioddef twyll rhamant.

Bydd eu llun proffil wedi cael ei ddwyn o broffil person diniwed.

Bydd eu cyfrif, boed ar gyfryngau cymdeithasol neu ar ap chwilio am gymar, yn newydd ac ychydig iawn o wybodaeth neu negeseuon fydd arno.

Yn aml, maen nhw’n gwrthod galwadau fideo ac yn gwneud esgusodion os ydych chi’n gofyn i siarad ar y ffôn.

Efallai byddant yn gofyn i chi guddio eich perthynas rhag eich teulu a ffrindiau.

Ydi hyn yn swnio’n gyfarwydd?

I riportio twyll rhamant, cysylltwch ag Action Fraud ar 0300 123 2040 neu ewch i’r wefan www.actionfraud.police.uk.

Mae Cymorth i Ddioddefwyr yn gallu rhoi cymorth emosiynol i ddioddefwyr pob mathau o droseddau hefyd, os ydynt wedi cael eu riportio wrth yr heddlu neu beidio. I gael cymorth a gwybodaeth, cysylltwch â llinell gymorth 24/7 am ddim yr elusen ar 0808 168 9111 neu ewch i’r wefan www.victimsupport.org.uk.

Pan fyddwch chi ar-lein, cofiwch:

• peidiwch byth â rhannu gwybodaeth bersonol
• mae unrhyw un yn gallu esgus bod yn rhywun arall
• peidiwch ag anfon arian at rywun ‘dych chi ond yn eu hadnabod yn rhithiol.