Mae cam-drin domestig yn digwydd dros y Nadolig hefyd - sut gallwch chi adnabod arwyddion bod rhywun yn dioddef?

Mae Heddlu Gwent yn gofyn i’r cyhoedd fod yn ymwybodol a chadw golwg am arwyddion y gall rhywun fod yn dioddef cam-drin domestig dros gyfnod y Nadolig.

Dywed Prif Uwch-arolygydd Nicky Brain: “Y llynedd roedd mwy na 9,000 o droseddau cam-drin domestig yng Ngwent. Rydym yn gwybod bod digwyddiadau o gam-drin domestig yn cynyddu dros gyfnod y Nadolig.

“Ein neges i unrhyw un sy’n dioddef cam-drin domestig yw - peidiwch â dioddef yn dawel. Gofynnwn yn daer arnoch chi i riportio beth sy’n digwydd er mwyn i ni allu eich helpu chi.

“Rwy’n gwybod y gall fod yn anodd i chi riportio digwyddiad ond hoffwn dawelu meddwl unrhyw un sy’n ystyried gwneud hynny bod ystod gyfan o gefnogaeth ar gael, nid yn unig gan yr heddlu ond gan asiantaethau partner hefyd.

“’Dyw cam-drin domestig ddim yn gwahaniaethu – gall unrhyw un ddioddef, beth bynnag yw ei oedran, rhywedd, cyfeiriadedd rhywiol neu gefndir cymdeithasol. Nid yw’n drosedd y gellir ei gweld yn amlwg bob amser, gellir ei chuddio.

“Rydym yn cydnabod y bydd pawb ohonom yn dathlu’r Nadolig yn wahanol eleni oherwydd yr argyfwng iechyd parhaus ond, yn awr yn fwy nag erioed, mae angen i ni edrych ar ôl ein gilydd. Os ydych chi’n pryderu bod aelod o’r teulu, ffrind neu gydweithiwr yn dioddef cam-drin domestig, codwch eich llais.

“Mae mynd i’r afael â cham-drin domestig yn flaenoriaeth i Heddlu Gwent o hyd. Trwy weithio gyda’n gilydd, gallwn wneud gwahaniaeth wrth gefnogi aelodau mwyaf bregus ein cymunedau.”

Gall cam-drin domestig fod ar sawl ffurf, gan gynnwys:

• cam-drin emosiynol
• cam-drin ariannol
• ymddygiad sy’n fygythiol, yn rheoli ac yn gorfodi
• cam-drin rhywiol
• cam-drin corfforol

Mae arwyddion y gall rhywun fod yn dioddef cam-drin domestig yn cynnwys:

• Anafiadau corfforol
• Gwisgo dillad, neu golur trwm, i guddio anafiadau
• Rhywun sy’n ofni neu’n awyddus i blesio partner.
• Rhywun heb fynediad at ei arian ei hun.
• Rhywun sy’n dawedog ac yn anfodlon cymryd rhan mewn sgwrs gyfeillgar.
• Rhywun sy’n newid personoliaeth o gwmpas partner, neu’n ymddangos yn fwy nerfus neu anesmwyth yn ei gwmni.
• Efallai bod partner dioddefwr yn genfigennus, yn fygythiol neu’n feddiannol. Efallai ei fod yn darllen negeseuon, negeseuon e-bost, cyfryngau cymdeithasol ac yn defnyddio cyfrineiriau’r dioddefwr. Efallai ei fod yn ffonio neu anfon negeseuon yn gyson at y dioddefwr i wirio beth mae’n ei wneud.

Os ydych chi’n dioddef, neu’n pryderu am rywun rydych yn ei adnabod, gallwch ffonio llinell gymorth Byw Heb Ofn am ddim i gael cyngor a chefnogaeth 24/7:

Ffôn: 0808 80 10 800

Neges destun: 078600 77 333

Gallwch ffonio Heddlu Gwent ar 101 hefyd neu anfon neges uniongyrchol atom ar Facebook neu Twitter. Ffoniwch 999 mewn argyfwng.