Cadwch yn ddiogel wrth deithio y Nadolig hwn drwy ddilyn rheolau'r ffyrdd

Nid oes dianc rhag y ffaith fod 2020 wedi bod yn anodd – gyda chyfyngiadau symud lleol a chenedlaethol a chyfyngiadau ar deithio – i bawb. Er y bydd y Nadolig yn teimlo'n wahanol eleni, mae rheolau'r ffordd yn dal i fod yr un fath.

Mae Heddlu Gwent yn atgoffa modurwyr i gadw'n ddiogel drwy barhau i ddilyn rheolau'r ffordd – a fydd yn dal i fod yr un fath – y Nadolig hwn.

Er efallai y bydd y ffyrdd yn dawelach nag arfer, disgwylir y bydd prif ffyrdd ac is-ffyrdd yn brysurach rhwng dydd Mercher 23 Rhagfyr a dydd Sul 27 Rhagfyr wrth i bobl deithio o amgylch Cymru a'r DU yn ehangach i ymweld â'u teuluoedd ar gyfer y Nadolig.

Cynghorir defnyddwyr y ffordd i sicrhau eu bod wedi archwilio eu cerbydau cyn cychwyn ar daith hir a'u bod wedi'u paratoi'n briodol ar gyfer tywydd garw.

Gallant hefyd leihau peryglon y 'pump angheuol' drwy beidio ag yfed na chymryd cyffuriau ac yna gyrru; ufuddhau i'r terfyn cyflymder; peidio â bod yn ddiofal wrth yrru; gwisgo gwregys diogelwch bob amser a diffodd dyfeisiau electronig.

Dywedodd y Rhingyll Jason Williams:

"Nid oes dianc rhag y ffaith fod 2020 wedi bod yn anodd – gyda chyfyngiadau symud lleol a chenedlaethol a chyfyngiadau ar deithio – i bawb. Gwyddom y gallai'r Nadolig deimlo'n wahanol eleni, ond mae rheolau'r ffordd yn dal i fod yr un fath.

"Wrth i'r Nadolig nesáu, rydym ni eisiau atgoffa pobl ei bod yn gwbl annerbyniol i yrru o dan ddylanwad alcohol neu gyffuriau.

"Rydym ni’n ffodus bod y mwyafrif llethol o fodurwyr yn defnyddio ein ffyrdd mewn modd synhwyrol ac yn unol â’r gyfraith."

Bydd swyddogion i’w gweld o gwmpas ardal gyfan yr heddlu gan helpu i gadw cymunedau yn ddiogel ac amddiffyn a rhoi tawelwch meddwl i'r cyhoedd drwy gydol cyfnod yr ŵyl.

Bydd yr heddlu'n gweithio gyda'n partneriaid yn y gwasanaethau brys ac yn cynnig cymorth iddyn nhw, gan gofio bod llawer ohonynt yn paratoi ar gyfer un o adegau prysuraf y flwyddyn.

Dywedodd y Prif Arolygydd Martyn Smith:

"Mae'r neges eleni yn syml; peidiwch â pheryglu eich bywydau a bywydau pobl eraill drwy yrru tra eich bod o dan ddylanwad alcohol - gall yfed gartref olygu eich bod yn dal i fod dros y terfyn y bore wedyn.

"Nid ydym ni eisiau atal pobl rhag dathlu'r Nadolig a mwynhau eu hunain, ond rydym ni eisiau i bobl gadw'n ddiogel, aros yn synhwyrol a bod yn ymwybodol o'r straen ychwanegol sydd ar y gwasanaethau brys dros gyfnod yr ŵyl, yn enwedig ar yr adeg dyngedfennol hon.

"Mae diogelwch ar y ffyrdd yn hollbwysig i Heddlu Gwent. Ni fyddwn yn goddef ymddygiad sy'n achosi perygl i fywydau ar ein ffyrdd.

"Rydym ni eisiau pwysleisio y bydd unrhyw fodurwr sy'n cael ei ddal yn gyrru ei gerbyd yn beryglus, yn afreolaidd neu'n rhyfygus yn cael ei erlyn."

Cynghorir modurwyr a fydd yn gyrru i’n hardal heddlu ni dros y Nadolig hefyd i sicrhau eu bod yn gyfarwydd â'r canllawiau gan awdurdodau lleol yng Ngwent a Llywodraeth Cymru ynghylch y coronafeirws.