Cadwch yn ddiogel wrth siopa ar-lein y Nadolig hwn

Wrth i’r Nadolig agosáu, rydym yn atgoffa’r cyhoedd am ein hawgrymiadau ar gyfer  siopa ar-lein yn ddiogel.

Ym mis Rhagfyr y llynedd, collwyd dros £13,000 gan ddioddefwyr twyll yng Ngwent drwy siopa ac arwerthiannau ar-lein. Dywedodd Ditectif Uwch-arolygydd Nick Wilkie, arweinydd seiberdrosedd a thwyll: “Mae’r Nadolig bob amser yn gyfnod prysur i ni a disgwylir y bydd mwy ohonom yn siopa ar-lein eleni yn sgil y pandemig iechyd parhaus. Yn anffodus, bydd twyllwyr yn bachu ar y cyfle i gymryd mantais o siopwyr ar-lein hefyd.

“Hoffem annog pobl i ddilyn cyngor yr ymgyrch Take Five to Stop Fraud i gadw eu hunain yn ddiogel rhag twyll. Arhoswch am eiliad i ystyried cyn cyflwyno arian neu wybodaeth a pheidiwch â gadael i droseddwr roi pwysau arnoch chi i wneud penderfyniad y byddwn yn ei ddifaru.

“Gall unrhyw un ddioddef twyll. Os ydych chi’n credu eich bod wedi dioddef twyll, cysylltwch â’ch banc ar unwaith, riportiwch y mater i’r heddlu ar 101 neu i Action Fraud ar-lein ar actionfraud.police.uk neu drwy ffonio 0300 123 2040.”

 

Cofiwch yr awgrymiadau hyn er mwyn cadw’n ddiogel wrth siopa ar-lein:

• Prynwch gan wefannau dibynadwy bob tro. Gwnewch ymchwil cyn prynu gan wefan neu unigolyn nad ydych yn ei adnabod. Edrychwch ar-lein am adolygiadau am y wefan neu’r unigolyn rydych yn prynu ganddo. Os ydych yn prynu eitem o farchnad ar-lein, gallwch edrych ar sylwadau am y gwerthwr cyn mynd ymlaen i brynu.

• Byddwch yn ymwybodol o wefannau sydd wedi cael eu ffugio: gwefannau yw’r rhain sy’n edrych fel y rhai go iawn er mwyn dwyn eich manylion personol neu fanylion  banc pan fyddwch yn eu cyflwyno.
• Gwiriwch gyfeiriad y wefan ar frig bar cyfeiriad y wefan i sicrhau nad oes unrhyw nodau anghywir ynddo. Chwiliwch am ‘https’ ar ddechrau cyfeiriad y wefan a’r symbol clo clap.

• Cofiwch, os yw cynnig yn swnio’n rhy dda i fod yn wir, mae’n debyg ei fod. Mae nwyddau ffug o ansawdd salach. Maent yn gallu bod yn beryglus i’w defnyddio ac, yn bwysicach, maen nhw’n anghyfreithiol.

• Gwyliwch rhag cwmnïau neu unigolion sy’n gofyn am daliad trwy drosglwyddiad banc. Talwch gyda cherdyn debyd neu, gwell fyth, cerdyn credyd gan ei fod yn rhoi mwy o amddiffyniad i chi.

• Gwyliwch rhag negeseuon e-bost neu negeseuon testun gyda dolenni neu atodiadau. Os nad ydych yn siŵr, peidiwch â defnyddio’r ddolen ac ewch yn uniongyrchol i’r wefan yn lle hynny.
• Gwnewch yn siŵr eich bod yn defnyddio cyfrinair cadarn, ar wahân, ar gyfer eich cyfrif e-bost. Gall troseddwyr ddefnyddio eich e-bost i fynd at gyfrifon ar-lein eraill, fel y rhai rydych yn eu defnyddio ar gyfer siopa ar-lein.

Am ragor o gyngor ewch i  https://www.gwent.police.uk/cy-GB/cyngor/cyngor-a-gwybodaeth/fa/twyll/twyll-personol/siopa-ar-lein/