Heddlu Gwent yn ymuno ag ymgyrch diogelwch ar y ffyrdd cenedlaethol

Yn ystod 2019, cafodd 598 o yrwyr beiciau modur a 412 o seiclwyr eu lladd neu eu hanafu mewn gwrthdrawiadau ar ffyrdd Cymru.

Rhwng 5 - 18 Ebrill, mae Cyngor Cenedlaethol Penaethiaid yr Heddlu (NPCC) ac Ymgyrchoedd, Cuddwybodaeth ac Ymchwilio Plismona Ffyrdd Cenedlaethol (NRPOII) yn trefnu ymgyrch diogelwch ar y ffyrdd "2 olwyn", i wella diogelwch ar y ffyrdd ar gyfer beiciau modur a seiclwyr.

Nod yr ymgyrch hon yw codi ymwybyddiaeth ymhlith modurwyr cyffredinol, yn ogystal â reidwyr, ynglŷn â sut i wella ymddygiad gyrwyr/reidwyr er mwyn gwella diogelwch ar y ffyrdd.

Yn ôl Cycling UK mae "62% o bobl yn y DU yn ystyried bod seiclo ar y ffyrdd yn rhy beryglus."

Un o'r bygythiadau mwyaf i ddiogelwch seiclwyr ar y ffordd yw modurwyr yn goddiweddyd yn rhy agos. Nid yn unig y mae pasio yn rhy agos yn fygythiol iawn, ond mae'n beryglus hefyd ac yn ffactor cyfrannol mewn 25% o wrthdrawiadau difrifol rhwng seiclwyr a cherbydau mawr (Cycling UK). 

Mae beicwyr modur ymhlith y grwpiau sydd fwyaf agored i niwed ar y ffyrdd, ac o'u cymharu ag eraill, maent mewn mwy o berygl o gael eu hanafu ac o fod yn rhan o wrthdrawiadau.

Dywed Uwch-arolygydd Glyn Fernquest: "Rydym wedi ymroi i wella diogelwch pawb sy'n defnyddio'r ffyrdd yng Ngwent, gan gynnwys beicwyr modur, seiclwyr a phobl sy'n marchogaeth.

"Dros y misoedd nesaf, wrth i'r tywydd wella ac wrth i fwy a mwy o feicwyr modur a seiclwyr ddefnyddio ein ffyrdd, byddwn yn ymgysylltu â reidwyr ledled Gwent i siarad am y camau y gallant eu cymryd i wella diogelwch a gwelededd.

"Mae pethau fel gwirio eich cerbydau cyn dechrau ar siwrnai, reidio o fewn y terfyn cyflymder cyfreithiol, rhoi digon o le ac amser i chi eich hun a phobl eraill wrth oddiweddyd a gosod eich hun yn y lle mwyaf diogel posibl i allu gweld yn glir yn gallu gwneud y ffyrdd yn fwy diogel i bob un ohonom."

Dylem gymryd gofal o'n beicwyr modur a'n seiclwyr trwy gofio:

Gall seiclwyr fod yn anodd eu gweld, yn enwedig ar gyffyrdd. Maent yn tueddu i fod yn sigledig hefyd, ac mae gwynt ochr yn effeithio'n hawdd arnynt wrth gael eu goddiweddyd. Maent yn arbennig o agored i niwed wrth gylchfannau gan na allant symud i ffwrdd yn gyflym iawn.

Gall beicwyr modur fod yn anodd eu gweld, yn enwedig ar gyffyrdd. Yn aml maent yn symud yn gyflymach nag y byddech yn ei feddwl a gall gwynt ochr effeithio arnynt pan fyddant yn cael eu goddiweddyd.

Dywedodd Teresa Ciano, Rheolwr Partneriaeth GanBwyll a Chadeirydd Diogelwch Ffyrdd Cymru:

"Mae gan bob un ohonom yr hawl i ddefnyddio'r ffyrdd yn ddiogel ac yn hyderus. Os ydym i gyd yn chwarae ein rhan ac yn rhannu'r ffyrdd yn gyfrifol drwy ymateb yn gyfrifol ac yn ddiogel, gallwn wneud pob taith yn daith ddiogel i holl ddefnyddwyr y ffyrdd; os ydynt yn teithio ar bedair olwyn neu ddwy.

“Beth am ofalu am ein gilydd ar y ffyrdd a dod â lefel yr anafiadau dwy olwyn ar ffyrdd Cymru i lawr."

Anogir beicwyr modur a seiclwyr i fynd i wefan Cymru ar y Beic i gael gwybodaeth ac arweiniad am gyrsiau, llwybrau a chyngor diogelwch.