Gwasgu'n dynn ar droseddau gyrru yng Nghasnewydd

Cafodd dros 40 o yrwyr eu riportio am droseddau moduro yn rhan o weithgarwch diweddaraf Ymgyrch Utah.

Mae Ymgyrch Utah yn ymgyrch amlasiantaeth a'i nod yw darganfod a mynd i'r afael â defnyddwyr ffyrdd sy'n rhoi modurwyr eraill mewn perygl - naill ai drwy yrru'n anghyfreithlon neu drwy yrru cerbydau nad ydynt o safon ddiogel.

Digwyddodd yr ymgyrch diogelwch ar y ffyrdd ddydd Gwener 9 Ebrill yn safle profi a phont bwyso'r Asiantaeth Safonau Gyrwyr a Cherbydau ar gylchfan Coldra, Casnewydd.

Ymunodd swyddogion â phartneriaid o'r Asiantaeth Safonau Gyrwyr a Cherbydau, Safonau Masnachu, y Tîm Cyd-gysylltu Trosedd Rhyngwladol a Phartneriaeth Lleihau Damweiniau ar y Ffyrdd Cymru.

Dyma gafodd ei riportio yn ystod diwrnod yr ymgyrch:

• Cafodd 88 o gerbydau eu stopio - 49 ar safle'r Asiantaeth Safonau Gyrwyr a Cherbydau a 39 oddi ar y safle yng Nghasnewydd a de Sir Fynwy
• Riportiwyd 41 o yrwyr gan yr heddlu am amrywiaeth o droseddau (gan gynnwys llwyth peryglus, cerbyd mewn cyflwr peryglus, platiau rhif ddim yn cydymffurfio â gofynion, gormod o bwysau ar gerbyd, troseddau llusgo cerbyd, gyrru heblaw yn unol â thrwydded, dim yswiriant, dim treth, dim MOT, dim gwregys diogelwch, gyrru heb ofal dyledus, goryrru, ffenestri wedi arlliwio a theiars diffygiol.
• Arestiwyd pump o bobl ar amheuaeth o nifer o droseddau yn ystod yr ymgyrch. Mae'r rhain yn cynnwys: methu prawf cyffuriau ar ochr y ffordd, gyrru'n anghymwys oherwydd alcohol neu gyffuriau, dwyn a meddu ar arf ymosodol.
• Atafaelwyd pum cerbyd am yrru heb drwydded neu yswiriant
• Atafaelwyd un cerbyd am ddiffyg treth cerbyd

Dywedodd Cwnstabl Heddlu Will Parr:

“Nod yr ymgyrch hwn yw atal troseddwyr rhag defnyddio'r ffyrdd a mynd i'r afael â defnyddwyr ffyrdd anghyfrifol sy'n peryglu pobl eraill trwy beidio â chadw at reolau diogelwch y ffyrdd neu drwy ddefnyddio cerbydau â diffygion peryglus.

"Hoffwn ddiolch i'n partneriaid am weithio gyda ni i wneud y ffyrdd yn ein cymunedau mor ddiogel â phosibl.

"Rwyf yn gobeithio y bydd canlyniadau'r ymgyrch hwn yn anfon neges glir bod gyrru'n anghyfrifol neu beidio â chynnal a chadw eich cerbyd yn annerbyniol a byddwn yn ymdrin yn gadarn â phobl sy'n gwneud hynny."