Dathlu pobl arbennig

Ers mis Ionawr 2021, gyda'i gilydd mae 75 cwnstabl gwirfoddol  Heddlu Gwent wedi gwirfoddoli 21,873  o oriau. Mae hynny'n fwy o oriau i bob gwirfoddolwr nac unrhyw heddlu arall yn y rhanbarth.

Mae gan yr heddlu gwirfoddol yr un pwerau a swyddogion arferol. Maen nhw'n gwisgo lifrai tebyg, yn cario'r un offer ac yn derbyn yr un hyfforddiant. Maen nhw'n 18 oed neu'n hŷn ac yn cefnogi swyddogion arferol mewn amrywiaeth o waith heddlu o ddydd i ddydd:  patrolau cerdded i atal ymddygiad gwrthgymdeithasol ac atal troseddwyr, ymateb i hysbysiadau am bobl ar goll, a chadw cymunedau'n ddiogel mewn llawer o ffyrdd.

Mae rhai yn hyfforddi i weithio o fewn timau plismona arbenigol hefyd, megis plismona ffyrdd ac amddiffyn pobl agored i niwed. Mae eraill yn defnyddio'u sgiliau mewn meysydd arbenigol, megis seiberdrosedd.

Mae gofyn i swyddogion gwirfoddol ymroi i isafswm o 16 awr o wasanaeth gwirfoddol y mis, ond mae llawer o gwnstabliaid gwirfoddol Gwent yn cyfrannu mwy o oriau na hyn.   

Mae gan swyddogion gwirfoddol Heddlu Gwent swyddi bob dydd mewn sawl diwydiant gan gynnwys TG, cynhyrchu bwyd, dysgu, y diwydiant awyrennau, gweinyddu, lletygarwch a'r sector cyhoeddus. Mae rhai ohonynt yn fyfyrwyr, rhai'n ofalwyr amser llawn a rhai wedi ymddeol. Maen nhw'n cynrychioli sawl cenedligrwydd, crefydd, ardal a chefndir ethnig. 

Mae Lou yn rhingyll gwirfoddol gyda Heddlu Gwent.  Mae wedi bod yn gwasanaethu am bron i ddwy flynedd.

"Rwy'n dod o gefndir gwasanaeth cwsmeriaid a gwerthu, ac roeddwn yn meddwl bod rhaid i chi fod yn ifanc i ymuno â'r heddlu - ond nid yw hynny'n wir o gwbl.

"Mae bod yn heddlu gwirfoddol hŷn yn gallu bod yn beth da - rwyf wedi cerdded i mewn i'r swydd gyda mwy o aeddfedrwydd a digon o brofiad bywyd.

"Nid yw rôl heddlu gwirfoddol yn golygu bod angen gwybod popeth – mae’n fwy i wneud gyda rhoi eich hun yn sefyllfa'r person rydych yn ymdrin â nhw. Os gallwch chi siarad â rhywun a deall y sefyllfa sy'n peri problem iddyn nhw, gallwch helpu i ddatrys y broblem.

"Os ydych chi'n ystyried ymuno â'r heddlu fel swyddog gwirfoddol, cofiwch fod hon yn rôl wirfoddol gwbl unigryw. 'Does dim byd arall yn dod yn agos ati, ac mae'n bwysig eich bod chi’n ymroi i'ch hyfforddiant. Bydd bywyd fel swyddog gwirfoddol yn dylanwadu ar y ffordd rydych chi'n gweld y byd.

“A sut byddwch chi ar eich ennill o fod yn swyddog gwirfoddol?  Byddwch yn magu hyder, cryfder a thwf personol, byddwch yn cyflawni rôl sy'n ennyn parch mewn tîm ardderchog, ac yn cael profiadau anhygoel. Bydd gan fy nhîm plismona le arbennig iawn yn fy nghalon am byth."

Roedd Owen yn un o'r garfan gyntaf i astudio'r cwrs gradd Plismona Proffesiynol BSc (Anrhydedd) ym Mhrifysgol De Cymru, Pontypridd. Mae wedi cyfrannu dros 1000 o oriau fel swyddog gwirfoddol yn ystod y flwyddyn ddiwethaf, a graddiodd gyda gradd Dosbarth Cyntaf yn ddiweddar.

"Roedd bod yn fyfyriwr Plismona Proffesiynol yn ystod Covid-19, yn golygu fy mod yn gallu gwneud swydd cwnstabl gwirfoddol amser llawn ac astudio ar yr un pryd. 

“Yn ystod fy nwy flynedd fel cwnstabl gwirfoddol, rwyf wedi gwneud yr un dyletswyddau â swyddogion amser llawn, ac wedi gwneud ffrindiau gwych.

"Cyn astudio a dod yn swyddog heddlu gwirfoddol, gweithiais yn y maes manwerthu am ddwy flynedd, ac rwyf wedi gwirfoddoli mewn banc yn y gorffennol hefyd. Mae gwirfoddolwyr yn gallu cael effaith enfawr ar eu cymuned.

“Fel gwirfoddolwr, mae gennych chi fwy o amser a'r gallu i ymroi i bethau sydd o bwys i chi. Mae rôl swyddog heddlu gwirfoddol yn gallu bod yn anodd ac yn ingol, ond ar ôl mynd adref (hyd yn oed ar ôl wythnos wael) rwy’n meddwl am y pethau rwyf wedi eu gwneud yn rhan o'r swydd ac rwy'n teimlo'n falch.

"Mae bod yn swyddog heddlu gwirfoddol yn gofyn am ymrwymiad go iawn, ac mae'n bwysig gwneud rhywfaint o ymchwil a deall beth sy'n ofynnol. Siaradwch gyda phobl sydd eisoes yn heddlu gwirfoddol, ac os ydych chi'n credu bod y rôl yn iawn i chi, ewch amdani gyda meddwl agored, dewch i adnabod y gymuned rydych yn gweithio ynddi, a pheidiwch â danto ar ôl wythnos wael. Cofiwch fod angen ymdrech er mwyn elwa: manteisiwch ar bob cyfle a byddwch yn dysgu llwythi ar hyd y ffordd. 

“Y peth gorau 'dwi erioed wedi'i wneud.”

Mae Gareth yn Arolygydd Gwirfoddol, ac mae ganddo swydd amser llawn yn y maes dylunio graffeg a digidol.

"Roedd ymuno â Heddlu Gwent fel swyddog gwirfoddol yn ddelfrydol i mi: Dwi'n gallu dal i weithio bob dydd yn gwneud gwaith 'dwi wrth fy modd yn ei wneud, a gwirfoddoli fel swyddog heddlu.

"Beth ydw i'n ei hoffi orau am fy rôl fel swyddog gwirfoddol? Wel, 'dwi wedi cwrdd â rhai o'm ffrindiau agosaf trwy'r gwaith hwn - 'dwi ddim yn credu y byddwn i wedi dod ar eu traws oni bai am yr heddlu gwirfoddol.

"Beth arall? Yr amrywiaeth: yr holl bethau dwi'n cael eu gwneud na fyddwn i’n cael y cyfle i'w gwneud fel sifiliad. Weithiau dwi'n gweithio gyda'r adran cŵn heddlu, ac weithiau ar ein tîm plismona ffyrdd. Dwi wedi gweithio mewn cyngerdd Little Mix, ar orymdeithiau Pride yng Nghaerdydd, a ‘dwi wedi cefnogi’r heddlu yn ystod ymweliad brenhinol.

"Mae fy hyfforddiant fel swyddog gwirfoddol wedi rhoi'r sgiliau i mi ddelio â phroblemau mewn ffordd ddigyffro a strwythuredig. Dwi'n hoffi bod yn rhan o'r teulu heddlu. Dwi yma am fy mod eisiau bod yma, dim i dderbyn cyflog. Pan 'dwi’n gwisgo fy lifrai, dwi'n esiampl - ond dwi hefyd yn berson arferol sydd wedi penderfynu ymroi i wneud ychydig mwy.

"Os ydych chi'n meddwl gwirfoddoli fel cwnstabl gwirfoddol, gwnewch hynny - ond peidiwch â meddwl ei fod yn mynd i fod yn beth hawdd. 'Dydi e' ddim yn hawdd. Fel heddlu gwirfoddol, ni sy'n penderfynu pryd rydym yn gweithio, nid sut rydym yn gweithio. Rydym yn gweithio i gyflawni'r un safonau uchel a gyda'r un protocolau a swyddogion heddlu arferol - ac rydym yn ennill sgiliau a hyder sy'n gwneud ein bywydau o ddydd i ddydd cymaint yn fwy gwerthfawr."

Prif Arolygydd Amanda Thomas sy'n arwain ar bartneriaethau Heddlu Gwent.

Wrth agor cyfnod recriwtio cwnstabliaid gwirfoddol diweddaraf Heddlu Gwent, dywedodd:

"Does dim un math penodol o gwnstabl gwirfoddol.

"Mae pob un yn dod â rhywbeth unigryw i'r tîm, ond mae pob un ohonynt yn rhannu'r un nod: rhoi o'u hamser a'u sgiliau i helpu i wneud cymunedau Gwent yn llefydd mwy diogel a chydlynus.

"Os gallwch chi roi 16 awr y mis, os ydych yn mwynhau her a datrys problemau, ac am helpu i gadw eich cymuned yn ddiogel a gwneud ffrindiau am oes, rydym eisiau clywed gennych chi."

Mae oriau gwirfoddoli yn hyblyg, a gallwch drefnu eich amser o gwmpas eich ymrwymiadau personol. 

Dysgwch fwy a dechreuwch ar eich ffurflen gais - Cwnstabliaid Gwirfoddol | Heddlu Gwent