Ymgyrch diogelwch ar y ffyrdd: gwasgu'n dynn ar bobl sy’n gyrru ar gyffuriau
Cynnwys y prif erthygl
Peidiwch â pheryglu eich bywyd chi a bywydau pobl eraill trwy yrru ar gyffuriau. Dyma neges yr ymgyrch diogelwch ar y ffyrdd diweddaraf.
Mae nifer yr euogfarnau am yrru ar gyffuriau wedi cynyddu ledled y wlad yn ystod y pum mlynedd diwethaf.
Y llynedd yng Ngwent, arestiodd swyddogion 617 o bobl ar amheuaeth o yrru ar gyffuriau.
Mae’r gosb yr un fath am yrru dan ddylanwad alcohol neu gyffuriau. Gallwch gael gwaharddiad rhag gyrru am 21 mis, dirwy ddiderfyn a dedfryd o garchar.
Rydym yn ymuno â heddluoedd eraill Cymru i gefnogi ymgyrch diogelwch ar y ffyrdd i godi ymwybyddiaeth o bum prif achos anafiadau ar ffyrdd y DU sy'n cael eu galw'n 'y pump marwol'.
Y 5 marwol | Cadw'n ddiogel ar y ffordd
- Cyflymder gormodol
Gall defnyddwyr ffyrdd sicrhau eu bod yn cadw eu hunain ac eraill yn ddiogel drwy edrych ar eu sbidomedr yn gyson, edrych am arwyddion a defnyddio’r gêr priodol (er enghraifft defnyddio’r trydydd gêr mewn parth 30mya).
- Peidio â gwisgo gwregys diogelwch
Mae’n ofynnol yn ôl y gyfraith i wisgo gwregys diogelwch mewn cerbyd sydd ag un wedi’i osod. Mae’r gyrrwr hefyd yn agored i gael ei erlyn os nad yw plentyn o dan 14 oed yn gwisgo un.
- Defnyddio ffôn symudol
Cynghorir gyrwyr i ddiffodd eu ffonau cyn cychwyn ar eu taith. Os cewch eich dal yn defnyddio dyfais symudol wrth yrru, fe gyflwynir hysbysiad cosb benodedig i chi a chewch ddirwy o £200 a chwe phwynt ar eich trwydded.
- Gyrru dan ddylanwad alcohol neu gyffuriau
Mae’r gosb yr un fath am yrru dan ddylanwad alcohol neu gyffuriau. Gallwch gael gwaharddiad rhag gyrru am 21 mis, dirwy ddiderfyn a dedfryd o garchar. Gellir dod o hyd i’r terfynau cyfreithiol ar gov.uk, ond rydym yn argymell os ydych chi’n yfed alcohol eich bod yn trefnu i rywun arall yrru.
- Gyrru'n ddiofal/anystyriol
Dylai gyrwyr fod yn ystyriol a pharhau i ganolbwyntio drwy’r amser.
Mae enghreifftiau o yrru’n beryglus yn cynnwys:
- gyrru’n rhy agos at y cerbyd o’ch blaen
- gyrru ar gyflymder nad yw’n addas i’r ffordd na’r amodau
- defnyddio llywiwr lloeren wrth yrru
- goddiweddyd ar y chwith neu’r dde mewn modd peryglus
Dywedodd Prif Arolygydd Martyn Smith:
“Mae gyrru dan ddylanwad cyffuriau neu alcohol yn amharu ar eich crebwyll, gan achosi i chi ymateb yn arafach ac felly mae'n cynyddu eich siawns o fod mewn gwrthdrawiad. Mae ein neges yn glir; peidiwch â pheryglu eich bywyd chi a bywydau pobl eraill sy'n defnyddio'r ffyrdd trwy yrru dan ddylanwad alcohol neu gyffuriau. 'Dyw e' byth yn dderbyniol.
"Mae diogelwch ar y ffyrdd yn hollbwysig i Heddlu Gwent ac ni fyddwn yn goddef ymddygiad sy'n peryglu bywydau ar ein ffyrdd. Rydym am bwysleisio y bydd unrhyw fodurwyr sy'n cael eu dal yn gyrru dan ddylanwad neu'n gyrru'n beryglus yn cael eu herlyn.
"Mae gan bob un ohonom ran i'w chwarae i sicrhau diogelwch pobl eraill sy'n defnyddio'r ffyrdd - gofynnaf yn daer ar fodurwyr i yrru'n ofalus, yn gyfrifol ac o fewn cyfyngiadau'r gyfraith ac i sicrhau bod eu cerbydau'n cael eu cynnal a'u cadw'n dda trwy'r amser."