Heddlu Gwent yn sefydlu grŵp gwarchod siopau yng Nglynebwy

Mae Swyddog Cymorth Cymunedol o Heddlu Gwent wedi ymuno â thîm Safonau Masnachu Cyngor Bwrdeistref Sirol Blaenau Gwent i gyflwyno cynllun gwarchod siopau yng nghanol tref Glynebwy.

Aeth SCC Julieanne Wilkinson i ymweld â siopau trwy gydol mis Tachwedd i gyflwyno’r cynllun.

Mae’r rhai sy’n ymuno â’r cynllun yn cofrestru ar blatfform negeseuon cymdeithasol ac, wrth fewngofnodi bob bore, gallant rannu newyddion am atal trosedd, pobl a ddrwgdybir o siopladrad sydd wedi cael eu gweld yn lleol ac unrhyw achosion o ddwyn sydd wedi digwydd yn ddiweddar.  

Wedyn gall aelodau riportio troseddau wrth Heddlu Gwent ar-lein, ar gyfryngau cymdeithasol neu drwy ffonio 101, neu 999 mewn argyfwng.

Meddai SCC Julieanne Wilkinson: “Rydym wedi cael adborth cadarnhaol iawn gan fasnachwyr, sy’n falch o’r rhwydwaith cyfathrebu sydd mewn lle i helpu i leihau trosedd.

“Yn ogystal ag atal dwyn a gwneud i siopwyr deimlo’n ddiogel ar y stryd fawr, rwy’n credu bod y cynllun yn creu ymdeimlad o gymuned ymysg y masnachwyr hefyd.”

Meddai Arolygydd Shane Underwood: “Rydym wedi ymroi i amddiffyn ein cymunedau rhag trosedd.

“Wrth i gyfnod y Nadolig agosáu, mae ein swyddogion yn parhau i weithio gyda phobl i dawelu eu meddyliau a rhannu cyngor atal trosedd.

“Mae ein Canolfan Datrys Problemau, tîm pwrpasol sy’n edrych ar strategaethau i fynd i’r afael â thueddiadau trosedd hirdymor ledled Gwent, yn gweithio gyda masnachwyr ar draws y sir i roi mesurau ar waith sy’n amddiffyn eu busnesau a chanfod siopladron.

“Mae ein hymateb i alwadau am droseddau’n bwysig iawn, wrth reswm, ond rydym yn dal i chwilio am ddulliau rhagweithiol y gallwn eu defnyddio i fynd i’r afael â gweithgareddau sy’n effeithio ar gymunedau.”