Lansio cynllun treialu apwyntiad fideo ar-lein newydd yng Ngwent i roi mwy o hyblygrwydd i bobl sy'n riportio troseddau, gwell gwasanaeth a llai o risg o drosglwyddo’r feirws

Rydym yn treialu system ar-lein newydd i ddarparu'r dewis i ddioddefwyr troseddau gael cyfarfod rhithwir gyda swyddog heddlu, neu'r rhai sy'n gwneud adroddiadau am droseddau lefel isel. 

Dyma'r ffordd ddiweddaraf y mae'r heddlu'n defnyddio cyfathrebu digidol...

Yn 2019, fe wnaethom gyflwyno'r ddesg ddigidol yn Ystafell Gyfathrebu’r Heddlu sy'n derbyn adroddiadau nad ydynt yn rhai brys drwy e-bost a’r cyfryngau cymdeithasol. Yn 2021 yn unig mae'r ddesg ddigidol wedi derbyn dros 170,000 o negeseuon a 7,000 o adroddiadau am droseddau ar-lein drwy wefan yr heddlu.

Rydym yn cyflwyno cyfarfodydd rhithwir wrth i Lywodraeth Cymru gyhoeddi mesurau pellach i leihau cyfradd trosglwyddo'r amrywiolyn Omicron ledled Cymru.

Dywedodd yr Uwch-arolygydd Matthew Williams:

"Mae ein defnydd o dechnoleg newydd eisoes wedi trawsnewid y gwasanaeth y gallwn ni ei ddarparu i gymunedau Gwent.

"Mae'r cynnig newydd hwn yn rhoi mwy o hyblygrwydd i ddioddefwyr neu bobl sy’n rhoi gwybod am ddigwyddiadau nad ydynt yn rhai brys, wrth barhau i sicrhau'r safon orau o ofal i ddioddefwyr.

"Wrth i bryderon godi ynghylch lledaeniad parhaus Omicron ledled Cymru, bydd mynd ar-lein ar gyfer rhywfaint o'n gwaith cyswllt yn helpu i leihau'r risg o drosglwyddo i'r cyhoedd a'n swyddogion.

"Rwy’n annog unrhyw un sy'n cael cynnig y gwasanaeth hwn i'w dderbyn a rhoi gwybod i ni beth yw eich barn."

Dim ond i'r rhai sy'n adrodd am droseddau lefel isel y cynigir cyfarfodydd ar-lein, lle na fydd angen ymateb corfforol uniongyrchol gan yr heddlu.

Cofiwch, i roi gwybod am fater brys ffoniwch 999 bob amser. I riportio troseddau nad ydynt yn rhai brys, anfonwch neges atom yn uniongyrchol ar Facebook neu Twitter, drwy www.gwent.police.uk  neu fel arall ffoniwch 101.