Apêl am dystion ar ôl i fachgen yn ei arddegau gael ei drywanu yng Nghasnewydd

Rydym yn apelio am wybodaeth ar ôl i fachgen 17 oed gael ei drywanu yn ei goes ar Heol Somerton, Casnewydd neithiwr, dydd Mercher 3ydd Chwefror.

Dilynwyd y bachgen gan bedwar gwryw o Barc Black Ash, i mewn i Gilgant Wright, Rhodfa Kitty Hawk ac i Heol Somerton tua 7.45pm - 8pm. Ymosodwyd arno i ddechrau gyda dwrn yn ei wyneb y tu allan i siop trin gwallt Perfect ar Heol Somerton ac yna cafodd ei drywanu yn ei goes y tu allan i Eglwys St Andrew. Yna rhedodd y troseddwyr i ffwrdd.

Aethpwyd â'r bachgen 17 oed i Ysbyty'r Faenor am driniaeth, ac mae'n dal yno mewn cyflwr sefydlog.

Cafodd ardal ei chwilio neithiwr ac mae'r ymchwiliad i ddod o hyd i'r troseddwyr yn parhau heddiw.

Yn ôl y disgrifiad roedd un o'r troseddwyr yn ddu, tua 5'8" - 5'9" o daldra ac roedd yn gwisgo cot ddu, fel un North Face, a throwsus du. Roedd un arall yn Asiaidd, tua  5'10" - 5'11" o daldra ac roedd yn gwisgo tracwisg lwyd.

Rydym yn awyddus i siarad ag unrhyw un a oedd yn yr ardal adeg y digwyddiad neu sydd â delweddau teledu cylch cyfyng o'r strydoedd a enwir, neu unrhyw un a allai fod wedi bod yn teithio trwy'r ardal sydd â delweddau camera car.

Cysylltwch â ni ar 101 gan ddyfynnu 2100040126, neu ar ein tudalennau Facebook neu Twitter os gallwch helpu.