Gofynnwn i berchnogion cŵn fod yn wyliadwrus ar ôl achosion o bobl yn ceisio dwyn

Gofynnir i berchnogion cŵn fod yn wyliadwrus ar ôl i bobl geisio dwyn cŵn yng Nghasnewydd a Sir Fynwy.

Cawsom ein hysbysu gan aelod o’r cyhoedd bod dau ddyn wedi mynd i fyny ato pan oedd yn cerdded ei gi ar Heol y Gorfforaeth, Casnewydd, ddydd Sadwrn 6 Chwefror, ychydig cyn 8.15pm. Ceisiodd un o’r dynion ddwyn sylw perchennog y ci er mwyn i’r llall dorri tennyn y ci gyda siswrn.

Llwyddodd y perchennog a’r ci i ddianc heb niwed.

Mae swyddogion hefyd yn ymchwilio i ymgais i ladrata a ddigwyddodd ger Comin Tryleg ddoe, tua 4.50pm. Dywedodd dyn ei fod ef a’i gi yn y car yn barod i fynd adref ar ôl bod am dro pan dynnodd dyn anhysbys ef o’r car ac ymosod arno. Gadawodd y dyn yn waglaw mewn Ford Ranger glas tywyll/du.

Cafodd y dioddefwr anaf i’w wyneb yn ystod yr ymosodiad.

Dywedodd Arolygydd Nikki Hughes: “Wrth reswm, mae hysbysiadau fel y rhain yn peri pryder i berchnogion cŵn a hoffem sicrhau trigolion ein bod yn ymchwilio’n drwyadl i’r achosion hyn.

“Rydym wedi derbyn dau alwad gan aelodau’r cyhoedd heddiw yn lleisio pryderon am gerbydau amheus ac, yn benodol, dynion yn holi am gŵn a busnesau llety cŵn. Gofynnwn yn daer ar unrhyw un sy’n gweld unrhyw beth amheus i’w riportio wrth yr heddlu.

“Gofynnwn i berchnogion cŵn gymryd camau diogelwch ychwanegol i sicrhau bod eu cŵn yn ddiogel, er enghraifft trwy sicrhau bod gan eich anifail anwes ficrosglodyn a gwirio eich gosodiadau preifatrwydd ar gyfryngau cymdeithasol cyn rhannu lluniau o’ch anifail anwes ar-lein, i osgoi denu sylw troseddwyr.

“Hoffwn annog pobl sy’n prynu cŵn i ystyried o ble mae’r anifail wedi dod a sicrhau ei fod yn cael ei brynu’n gyfreithlon. Mae cyngor ar gael ar-lein ar y gwiriadau y dylech eu gwneud cyn prynu ci neu gi bach newydd.”

Gofynnir i unrhyw un ag unrhyw wybodaeth, neu sy’n gweld unrhyw un yn ymddwyn yn amheus, ein ffonio ar 101 gan ddyfynnu cyfeirnod 2100048681 neu ffonio 999 mewn argyfwng.

Cyngor ar sut i gadw’ch anifail anwes yn ddiogel

• Sicrhewch eich bod yn rhoi microsglodyn ar eich anifail anwes - os yw eich ci’n rhedeg i ffwrdd ac yn cael ei ddarganfod, mae’n hawdd eich olrhain chi fel ei berchennog. Os caiff eich ci ei ddwyn, pan gaiff ei gymryd at y milfeddyg, bydd y milfeddyg yn canfod bod gan y ci ficrosglodyn a byddwch yn cael eich adnabod fel ei wir berchennog
• Peidiwch â gadael cŵn ar eu pennau eu hunain ar y stryd, ni waeth pa mor fach a chyfeillgar yw’r gymuned
• Peidiwch â’u gadael nhw ar eu pennau eu hunain yn y car
• Gwnewch yn siŵr bod eich gardd yn ddiogel a pheidiwch â’u gadael nhw ar eu pennau eu hunain am gyfnodau hir.
• Os ydych yn eu cadw y tu allan, gwnewch yn siŵr bod eich eiddo a’r cytiau cŵn yn ddiogel.

Am ragor o wybodaeth ewch i wefan Blue Cross www.bluecross.org.uk/pet-advice/protect-your-dog-against-theft