Covid-19: Patrolau rhagweithiol Heddlu Gwent dros y penwythnos

Cyhoeddwyd dros 100 o hysbysiadau cosb benodedig am achosion o dorri rheolau Covid-19 dros y penwythnos yng Ngwent.

Cyhoeddwyd yr hysbysiadau i bobl am gynnal partïon mewn tai a chasglu ynghyd i gymdeithasu yn ogystal â theithio heb esgus rhesymol.

Mae swyddogion yn parhau i gynnal patrolau rhagweithiol yn y gymuned gan gynnwys gwiriadau cerbydau ar ochr y ffordd ar y ffyrdd sy'n cael eu defnyddio fwyaf.  Mae'r gwiriadau hyn yn galluogi ein swyddogion i ymgysylltu â'r cyhoedd ynghylch pwysigrwydd cadw at reolau Covid Llywodraeth Cymru a chynnal gwiriadau diogelwch ar y ffyrdd ychwanegol ar gerbydau.

Cafodd dros 300 o fodurwyr eu stopio yn ystod gwiriadau ar ochr y ffordd dros y penwythnos. Cyhoeddwyd nifer o hysbysiadau cosb benodedig am dorri rheolau Covid-19, atafaelwyd 16 o gerbydau am ddiffyg yswiriant a chafodd 31 o fodurwyr wŷs am oryrru.

Cynhaliwyd mesurau diogelwch ffyrdd hefyd gan gynnwys profion llygaid i yrwyr a gwiriadau megis diogelwch teiars ar gerbydau.

Dywedodd Prif Uwch-arolygydd Mark Hobrough: “Rydym yn deall bod hwn yn gyfnod anodd iawn i'n cymunedau a hoffem ddiolch i'r rheini sy'n dal i gadw at gyfyngiadau Llywodraeth Cymru. Rydym wedi cymryd camau gorfodi yn erbyn pobl sy'n torri'r rheolau'n ddi-hid a byddwn yn parhau i wneud hynny.

"Mae'n gwbl annerbyniol i bobl fod yn trefnu partïon yn eu tai ac yn casglu ynghyd i gymdeithasu yn ystod y cyfnod hwn. Mae'r bobl sy'n mynd yn groes i'r cyfyngiadau yn peryglu bywydau.

“Mae cyfyngiadau lefel rhybudd 4 yn dal mewn grym yng Nghymru sy'n golygu y dylai pobl aros yn eu cartrefi a pheidio â theithio oni bai bod hynny'n angenrheidiol.  Mae lefelau Coronafeirws yn dal yn uchel ar draws llawer o ardaloedd Gwent, a thrwy ddilyn cyngor Llywodraeth Cymru mae pob un ohonom yn achub bywydau ac yn amddiffyn y GIG.

“Byddwn yn parhau i ymgysylltu, esbonio ac annog ein cymunedau i weithio gyda ni i gadw pawb yn ddiogel. Mae gan bawb ran i'w chwarae i atal lledaeniad y feirws hwn."