New multi-agency safeguarding hubs launched in Gwent

Canolfannau diogelu amlasiantaeth newydd wedi cael eu lansio yng Ngwent

Mae canolfannau diogelu newydd wedi cael eu lansio trwy Went gyfan, i helpu oedolion a phlant bregus i gael mynediad i'r gwasanaethau y mae eu hangen arnynt i'w cadw nhw'n ddiogel.

Yn y canolfannau bydd nifer o asiantaethau - gan gynnwys swyddogion heddlu, gweithwyr cymdeithasol, gweithwyr proffesiynol iechyd ac addysg, swyddogion prawf a staff o'r sector gwirfoddol - yn gweithio mewn partneriaeth i ddarparu gwybodaeth werthfawr ac arbenigedd proffesiynol i sicrhau bod pobl sydd angen help yn cael y gefnogaeth sydd ei hangen arnynt mor gyflym â phosibl.

Trwy weithio gyda'i gilydd bydd gweithwyr rheng flaen proffesiynol yn edrych ar bob ffurf ar fregusrwydd, gan gynnwys problemau amddiffyn plant ac oedolion fel camfanteisio, cam-drin ac esgeuluso.

Trwy ddod ag asiantaethau partner at ei gilydd dan un to, bydd y dull cydweithredol yn galluogi dioddefwyr i dderbyn y cymorth priodol gan y gwasanaethau perthnasol, gan gynnwys ymyrraeth gynnar, lle bydd plant ac oedolion yn cael eu cyfeirio at wasanaethau cymorth cynnar penodol fel Teuluoedd yn Gyntaf i sicrhau eu bod yn derbyn cymorth priodol ar y cyfle cynharaf posibl.

Mae canolfannau partneriaeth ar waith yn barod yng Nghasnewydd, Torfaen a Blaenau Gwent. Mae'r canolfannau newydd hyn yn adeiladu ar gynlluniau peilot llwyddiannus sydd wedi gweld gwelliant o ran ansawdd ac amseroldeb rhannu gwybodaeth rhwng partneriaid, gan arwain at ganlyniadau gwell i bobl sydd angen cymorth.

Dywedodd Prif Gwnstabl Cynorthwyol Ian Roberts:

"Bydd y canolfannau diogelwch yn darparu dull cyson a chydweithredol ar draws Gwent.

“Trwy gydweithio gall partneriaid rannu adnoddau a gwneud penderfyniadau cyflymach pan fydd pryderon diogelu yn cael eu riportio.

"Bydd y gwasanaethau hanfodol hyn yn cynnig y cymorth cywir i deuluoedd, ar yr adeg iawn."

Dywedodd cadeiryddion Bwrdd Diogelu Gwent, Damien McCann a Keith Rutherford:

“Mae Bwrdd Diogelu Gwent yn croesawu'r datblygiad hwn y mae wedi ei gefnogi yn ystod y cynllun peilot. Mae'n dda gweld ei bod yn bosibl ei ailadrodd ar draws y pum ardal awdurdod lleol yng Ngwent, a fydd yn sicrhau bod penderfyniadau i ddiogelu plant ac oedolion bregus yn cael eu gwneud yn gyflym ac yn gydweithredol. Bydd y gwaith partner hwn yn galluogi holl sefydliadau Gwent i ddefnyddio dull mwy ataliol ac ymyrryd yn gynnar.

Bydd y canolfannau newydd yng Nghaerffili, Blaenau Gwent, Torfaen, Casnewydd a Sir Fynwy.