Dwy garfan newydd o swyddogion yn ymuno â Heddlu Gwent

Ers dechrau mis Ionawr mae 64 o swyddogion newydd wedi dechrau eu gyrfaoedd yn y gwasanaeth heddlu.

Mae Heddlu Gwent wedi croesawu dros 60 o swyddogion i'r teulu plismona yn ystod wythnosau cyntaf 2021.

Dechreuodd 28 o swyddogion heddlu sy'n astudio ar gyfer cymhwyster ymarfer plismona gyda'r llu ddydd Llun 4 Ionawr, yn rhan o'r fenter genedlaethol Ymgyrch Uplift.

Ymunodd 36 o swyddogion cymorth cymunedol â'r llu wythnos yn ddiweddarach, yn rhan o ymgyrch recriwtio blynyddol Heddlu Gwent ar gyfer y rôl.

Dywedodd dirprwy brif gwnstabl Amanda Blakeman:

"Mae croesawu wynebau newydd i'r gwasanaeth heddlu, pob un ohonynt ag amrywiaeth o sgiliau a thalentau, yn achos balchder; nid yn unig i Heddlu Gwent fel sefydliad, ond i blismona fel proffesiwn, i'r swyddogion hyn ac i'w teuluoedd a ffrindiau.

“Rydym wedi ymroi i amddiffyn a thawelu meddwl y cyhoedd a bydd y swyddogion newydd hyn yn rhan o'n nod i ddarparu'r gwasanaeth gorau posibl i'n cymunedau.

"Trwy gydol y pandemig presennol rydym wedi parhau i recriwtio a hyfforddi swyddogion newydd, i'n helpu i ddarparu gwasanaeth plismona effeithiol yn ystod y cyfnod heriol hwn ac yn dilyn toriadau i'r gwasanaeth dros nifer o flynyddoedd blaenorol.

"Mae'r buddsoddiad mewn plismona trwy Ymgyrch Uplift yn ein galluogi ni i gyflawni ein cynlluniau recriwtio presennol a llenwi swyddi gwag hanfodol.

"Wrth i ni symud trwy 2021 a thu hwnt, rydym yn gobeithio bod mewn sefyllfa i groesawu mwy o bobl i swyddi ar draws y sefydliad, gan gynnwys swyddi rheng flaen."

Er gwaethaf heriau'r argyfwng iechyd parhaus, cynhaliwyd hyfforddiant ar gyfer y swyddogion newydd mewn amgylcheddau diogel o ran COVID ochr yn ochr â dysgu rhithiol.

Dywedodd comisiynydd yr heddlu a throseddu Gwent, Jeff Cuthbert:

"Rwyf wrth fy modd bod Heddlu Gwent wedi croesawu 28 o swyddogion heddlu newydd a 36 o swyddogion cymorth cymunedol newydd y mis hwn.

“Mae dechrau gyrfa newydd yn y gwasanaethau brys, yn gweithio ar y rheng flaen yng nghanol pandemig, yn gofyn am ddewrder ac ymroddiad.

“Mae'r swyddogion newydd hyn wedi ymroi i amddiffyn a gwasanaethu ein cymunedau ac maent yn ymuno â Heddlu Gwent ar adeg dyngedfennol. Dymunwn bob hwyl iddynt ar gyfer y dyfodol.”

Ym mis Gorffennaf, ymunodd 36 o swyddogion newydd â Heddlu Gwent yn rhan o Ymgyrch Uplift; cyllid Llywodraeth y DU ar gyfer 20,000 o bersonél heddlu newydd yn y DU a gyhoeddwyd ym mis Medi 2019.

I ddysgu mwy am ein swyddi gwag presennol neu i gofrestru i dderbyn gwybodaeth am gyfleoedd cyflogaeth gyda ni yn y dyfodol, ewch i'n gwefan.