Twrnamaint pêl-droed yn dod â chymunedau at ei gilydd

Cynhaliwyd twrnamaint cyntaf Cwpan Cydlyniant Casnewydd y penwythnos diwethaf ac rydym yn falch i fod yn rhan ohono

Trefnwyd y twrnamaint pêl-droed gan y Tîm Cymorth Lleiafrifoedd Ethnig ac Ieuenctid (EYST), Heddlu Gwent, Casnewydd Fyw a Sir Casnewydd yn y Gymuned. Ei nod yw chwalu rhwystrau a chadarnhau cydberthnasau rhwng cymunedau.

Cynhaliwyd y gêm rownd gyntaf rhwng tîm o gymuned de ddwyrain Asia a thîm o’r gymuned Yemenïaidd ym Mhentref Chwaraeon Rhyngwladol Casnewydd, Spytty, ddydd Sul 25 Gorffennaf.

Roedd swyddogion, swyddogion cymorth cymunedol a staff o’n hadran amrywiaeth a chynhwysiant yn bresennol i gefnogi ac ymgysylltu â chwaraewyr.

Bydd y twrnamaint yn cael ei gynnal dros yr haf a bydd yn cynnwys timau sy’n cynrychioli cymunedau Bangladeshaidd, Yemenïaidd, Pwylaidd a Sudaneaidd o Gasnewydd. Bydd y tîm buddugol yn chwarae yn erbyn tîm yr heddlu a phartneriaid mewn gêm gwpan derfynol arbennig ar 22 Awst.

Dywedodd Prif Uwch-arolygydd Tom Harding: “Rydym yn falch i fod yn rhan o fenter mor wych i ddod â’n cymunedau amrywiol at ei gilydd yng Nghasnewydd. Mae meithrin cydberthynas gadarnhaol rhwng plismona lleol a chymunedau mor bwysig.

“Mae prosiectau fel hyn yn helpu i fagu ymddiriedaeth a gwella ein dealltwriaeth o anghenion ein cymunedau amrywiol. Hoffwn ddweud diolch enfawr wrth bawb sydd wedi gwneud y twrnamaint hwn yn bosibl a dymuno pob lwc i’r holl chwaraewyr.”