Gorchymyn cau ar gyfer tŷ yng Nghil-y-coed yn dilyn ymddygiad gwrthgymdeithasol

Cafodd drysau a ffenestri tŷ yn Longfellow Close, Cil-y-coed, eu gorchuddio â phren yr wythnos diwethaf yn dilyn cais llwyddiannus am orchymyn cau yn Llys Ynadon Casnewydd.

Cafodd y gorchymyn cau tri mis o hyd ei roi ar 16 Gorffennaf ar ôl i nifer o gwynion gael eu gwneud yn ymwneud ag ymddygiad gwrthgymdeithasol yn y cyfeiriad. Cafodd mynedfeydd y tŷ eu hatal gan bren ddydd Mercher, 21 Gorffennaf.

Yn ystod cyfnod y gorchymyn, gall yr heddlu arestio unrhyw un sy'n ceisio mynd i mewn i'r eiddo hwn yn groes i'r hysbysiad.

Dywedodd arolygydd Sir Fynwy, Nikki Hughes:

"Mae lefelau uchel o ymddygiad gwrthgymdeithasol sy'n gysylltiedig â'r eiddo hwn wedi effeithio'n negyddol ar ansawdd bywyd trigolion yng nghymuned leol Cil-y-coed dros y misoedd diwethaf. Mae swyddogion wedi gweithio gyda phreswylwyr a phartneriaid i gael y gorchymyn cau hwn. 

"Rwy'n gobeithio y bydd hyn yn rhoi sicrwydd i breswylwyr, os oes ganddynt bryderon am safleoedd sy’n achosi problemau a niwed i'r gymuned, y gallant roi gwybod amdanynt a byddwn yn gweithio'n galed gyda'n partneriaid i weithredu.

"Mae mynd i'r afael ag ymddygiad gwrthgymdeithasol yn flaenoriaeth i ni ac rydym yn annog unrhyw un sydd ag unrhyw bryderon i gysylltu."

Sut i roi gwybod am ymddygiad gwrthgymdeithasol?

📞 ffonio 101

💻 ar-lein drwy http://orlo.uk/hkPwl

📲 anfon neges uniongyrchol atom ar Facebook neu Twitter

Ydy ymddygiad gwrthgymdeithasol wedi effeithio arnoch chi?

Mae cymorth ar gael drwy Connect Gwent 📞 0300 123 21 33 neu ewch i 💻 www.connectgwent.org.uk.