Heddlu Gwent yn ymuno ag elusen i fynd i'r afael â bwlio

Mae Heddlu Gwent wedi ymuno â'r elusen Kidscape i helpu i atal a mynd i'r afael â bwlio.

Mae'r elusen gwrth-fwlio Kidscape yn rhoi cymorth ymarferol, hyfforddiant a chyngor i herio bwlio ac i amddiffyn plant. 

Bydd yn gweithio gyda'n tîm ymgysylltu â phobl ifanc - Nxt Gen - i hyfforddi oedolion a phlant er mwyn iddynt adnabod ac ymateb i fwlio. Eleni, tîm Nxt Gen Heddlu Gwent oedd yr heddlu cyntaf yng Nghymru i dderbyn Gwobr Efydd Llywodraeth Cymru am Waith Ieuenctid.

Bydd tîm Kidscape yn cyflwyno rhaglen ZAP yr elusen - gweithdai sy'n ymdrin ag ymwybyddiaeth o fwlio, sut i fod yn bendant a chadarn - i blant ledled Gwent.

Bydd ein Heddlu Bach yn helpu i ledaenu'r neges gwrth-fwlio maen nhw'n ei dysgu yn ystod eu hyfforddiant i'w cyfoedion hefyd.

Bydd y tîm ymgysylltu â phobl ifanc yn cymryd rhan yn y rhaglen arweinydd cymunedol hefyd. Bydd hyn yn cynnwys hyfforddiant i ddeall effaith bwlio ar fywydau pobl ifanc, adnabod yr arwyddion a sut i roi'r cymorth gorau i blant a theuluoedd.

Dywedodd Lauren Seager-Smith, Prif Swyddog Gweithredol Kidscape: “Rydym yn falch iawn i fod yn gweithio gyda Heddlu Gwent ar ymgyrch i rymuso plant i herio pob math o fwlio a chreu cymuned ddiogel a chynhwysol.  Dros y flwyddyn nesaf byddwn yn cydweithio i ddarparu hyfforddiant arweinydd cymunedol Kidscape i oedolion ac oedolion ifanc, gan rymuso cymuned Gwent i adnabod ac ymateb i fwlio - lle bynnag mae'n digwydd.

“Byddwn yn chwilio am gyfleoedd pellach - trwy Heddlu Bach a Chadetiaid Heddlu Gwent - i annog a chefnogi pobl ifanc i atal bwlio.  Bydd ein partneriaeth yn ein galluogi i gydweithio i rannu gwybodaeth a chyngor i blant a theuluoedd."

Dywedodd Prif Arolygydd Amanda Thomas o Heddlu Gwent: "Mae ein swyddogion Nxt Gen wedi ymroi i helpu pobl ifanc yng Ngwent. Trwy weithio gyda Kidscape ein nod yw, nid yn unig mynd i'r afael â bwlio ond codi ymwybyddiaeth o'r mathau o fwlio sy'n digwydd amlaf hefyd a hyrwyddo ffyrdd i riportio bwlio'n ddiogel, heb stigma.

"Mae'r flwyddyn ddiwethaf wedi bod yn gyfnod anodd iawn i'n cymunedau, yn arbennig i'n pobl ifanc. Rwyf am i bobl ifanc wybod bod ystod eang o gymorth ar gael i unrhyw un sy'n cael ei fwlio neu sy'n adnabod rhywun sy'n cael ei fwlio.

"Trwy weithio gyda'n gilydd, gallwn wneud gwahaniaeth i fywydau pobl ifanc yn ein cymunedau."

Mae cyngor a chymorth ar gael yma:

• Cyngor Kidscape i rieni 02078235430 neu [email protected]
• Cyngor Kidscape i bobl ifanc kidscape.org.uk/advice/advice-for-young-people/
• Gellir cysylltu â Childline trwy ffonio 0800 1111 neu ar https://www.childline.org.uk/