Heddlu Gwent yn gofyn yn daer ar bobl i wneud y dewis cywir

Mae Heddlu Gwent yn gofyn yn daer ar y cyhoedd i wneud y dewis cywir pan fyddant yn cysylltu â ni er mwyn helpu i gadw'r llinell 999 yn rhydd ar gyfer materion o argyfwng.

Rydym wedi lansio ymgyrch Gwnewch y Dewis Cywir, i'w gwneud yn haws i aelodau'r cyhoedd wybod pryd a sut i gysylltu â'r heddlu, a phwy i gysylltu â nhw i riportio materion nad ydynt yn ymwneud â'r heddlu, fel cŵn sy'n crwydro, tipio anghyfreithlon a phroblemau parcio.

Yn ystod y mis diwethaf derbyniodd ystafell reoli galwadau'r llu 7,488 o alwadau brys a 25,481 o alwadau difrys.

Mae hyn yn cyfateb i gynnydd 21 y cant mewn galwadau brys a chynnydd 21 y cant mewn galwadau difrys yn seiliedig ar ffigurau'r llynedd.

Rhwng mis Ionawr a mis Mai 2021, gwnaethom dderbyn dros 29,000 o alwadau brys a 122,000 o alwadau difrys.

O'r 151,000 o alwadau a dderbyniwyd rhwng mis Ionawr a mis Mai, nid oedd angen ymateb gan yr heddlu i 36 y cant ohonynt.

Mae llawer o bobl yn deialu 999 i riportio materion nad ydynt yn argyfwng ac mae angen i ni gadw'r llinellau brys ar gael er mwyn ymateb i aelodau ein cymuned sydd angen ein cymorth ar unwaith.

Enghreifftiau diweddar o bobl yn camddefnyddio 999:

• "Rwyf wedi gadael fy mag ar y bws."
• "Mae ci ein cymydog yn ein gardd gefn ond mae hi yn y gwaith felly 'dydyn ni ddim yn gwybod beth i'w wneud."

Enghraifft ddiweddar o gamddefnyddio 101:

• “Dwi methu mynd trwodd at y DVLA achos bod yr amser aros mor hir. Oes gennych chi unrhyw rifau eraill ar eu cyfer nhw?”

 

Dywedodd Uwch-arolygydd Matt Williams, sy'n gyfrifol am y gwasanaeth pwynt cyswllt cyntaf:

"Gofynnwn yn daer ar aelodau ein cymuned i wneud y dewis cywir pan fyddant yn cysylltu â ni. Cyn i chi gysylltu, ystyriwch - oes angen yr heddlu arnoch chi neu oes angen asiantaeth arall arnoch chi? 

"Rydym wedi bod yn derbyn llawer iawn o alwadau i'n gwasanaeth 999 a 101. Rwyf yn siŵr bod y tywydd twym diweddar a'r pandemig iechyd parhaus wedi chwarae rhan yn y cynnydd mewn galwadau.

"Mae pobl wedi bod yn camddefnyddio'r gwasanaeth 999 a allai fod yn fater o fyw neu farw i rywun yn ein cymuned. Trwy weithio gyda ni a gwneud y dewis cywir rydych chi’n helpu ein trinwyr galwadau i gyrraedd y rhai sydd angen ein cymorth fwyaf.

Mae ein llinell argyfwng 999 i helpu pobl sydd mewn sefyllfaoedd lle mae eu bywydau mewn perygl neu lle mae trosedd wrthi'n cael ei chyflawni. Gallwch gysylltu â ni mewn sawl ffordd ar gyfer ymholiadau nad ydynt yn argyfwng, gan gynnwys ein llinell 101, ein hadnodd riportio ar-lein ar ein gwefan a thrwy anfon negeseuon uniongyrchol ar gyfryngau cymdeithasol trwy gyfrwng Facebook a Twitter."

 

Ffoniwch 999 bob tro mewn argyfwng:

• Pan fydd perygl i fywyd neu eiddo
• I riportio trosedd sy'n cael ei chyflawni
• Pan fydd tramgwyddwr gerllaw
• Pan fydd trais yn cael ei ddefnyddio neu pan fydd rhywun yn bygwth defnyddio trais

Riportio mater nad yw'n argyfwng ar 101/ar-lein ac ar gyfryngau cymdeithasol:

• Troseddau sydd wedi digwydd yn barod
• Ymddygiad gwrthgymdeithasol
• Digwyddiad nad yw'n peri niwed/perygl ar unwaith
• Digwyddiadau nad oes angen ymateb brys iddynt

Pryd i gysylltu â'ch awdurdod lleol:

• Cŵn sy'n crwydro
• Cwynion am sŵn
• Problemau parcio
• Tipio anghyfreithlon