Croeso i'n Swyddogion Cymorth Cymunedol newydd
Cynnwys y prif erthygl
Mae 36 swyddog cymorth cymunedol (SCC) newydd yn gwasanaethu cymunedau Gwent yn dilyn seremoni cwblhau hyfforddiant a gynhaliwyd yr wythnos ddiwethaf.
Bydd y recriwtiaid yn ymuno â dros 120 o SCC presennol yn y llu sy'n chwarae rhan hollbwysig yn amddiffyn a thawelu meddwl ein cymunedau.
Mae SCC wrth galon ein cymunedau a'r wythnos hon rydym yn cefnogi ymgyrch #SCCHCymru i ddathlu'r gwaith maen nhw'n ei wneud i gadw pawb yn ddiogel rhag niwed a mynd i'r afael â phroblemau lleol.
Dywedodd Prif Gwnstabl Cynorthwyol Dros Dro Ian Roberts: "Mae SCC yn wynebau cyfarwydd i lawer ac maent yn gysylltiad hollbwysig rhwng cymunedau lleol a'r heddlu. Rwyf wrth fy modd i groesawu'r recriwtiaid newydd hyn a fydd yn ychwanegiad gwych i'r llu.
“Rydym wedi ymroi i wneud ein gweithlu'n fwy amrywiol fel ein bod yn fwy cynrychioliadol o'r cymunedau rydym yn eu gwasanaethu. Mae hyn yn meithrin ymddiriedaeth ac yn dod â gwahanol syniadau a safbwyntiau i'n sefydliad, ac yn ein helpu ni i ddarparu gwasanaethau gwell. Rwyf yn falch iawn felly i weld bod pump o'r recriwtiaid SCC newydd o leiafrif ethnig."
“Mae rôl SCC yn heriol ond yn foddhaus, ac mae'n allweddol o ran darparu presenoldeb amlwg sy'n tawelu meddwl yn ein cymunedau. Hoffwn ddiolch i'n SCC am eu hymroddiad i fynd i'r afael â phroblemau lleol a chefnogi'r bobl fwyaf bregus yn ein cymunedau, yn arbennig trwy gydol y pan demig Covid-19."
Dywedodd Comisiynydd yr Heddlu a Throseddu, Jeff Cuthbert: "Swyddogion Cymorth Cymunedol yw'r cysylltiad rhwng yr heddlu a'n cymunedau, yn helpu i feithrin ymddiriedaeth a datblygu cymunedau mwy cydlynus ledled Gwent. Nid yw'n swydd hawdd ac mae SCC yn aml yn rhoi cymorth i rai o'r bobl fwyaf bregus yn ein cymdeithas.
"Mae dechrau gyrfa newydd yn y gwasanaethau brys, yn gweithio ar y rheng flaen yn ystod pandemig, yn gofyn am ddewrder ac ymroddiad. Mae'r swyddogion newydd hyn wedi ymroi i gefnogi a gwasanaethu eu cymunedau a byddant yn gaffaeliad i Heddlu Gwent ar adeg dyngedfennol. Dymunaf bob hwyl iddynt gyda'u gyrfa newydd."