Atafaelu miloedd o bunnoedd ac arestio 13 o bobl mewn ymgyrch atal llinellau cyffuriau

Mae dros £14,000 o arian parod wedi’i atafaelu a 13 o bobl wedi’u harestio yn rhan o’r wythnos ddiweddaraf o weithredu i fynd i’r afael â llinellau cyffuriau yng Ngwent.

Cymerodd heddluoedd ledled y DU ran yn yr wythnos dwysáu rhwng dydd Llun 17 Mai a dydd Sul 23 Mai gyda’r nod o darfu ar y rhai hynny sy’n ymwneud â llinellau cyffuriau.

Model dosbarthu cyffuriau yw llinellau cyffuriau sy’n defnyddio ffonau symudol lle caiff cyffuriau eu hallforio o ddinasoedd mawr a’u mewnforio i ardaloedd eraill, gan ddefnyddio oedolion agored i niwed a phlant yn aml.

Mae’r canlyniadau ar gyfer yr wythnos yng Ngwent yn cynnwys:

• Arestio 13 o bobl
• Atafaelu cyffuriau dosbarth A gan gynnwys heroin, cocên a chrac cocên
• Atafaelu £14,580 o arian parod
• Siarad â nifer o bobl agored i ecsbloetio a chynnig cymorth iddyn nhw
• Atafaelu arfau gan gynnwys machete, morthwyl a dwrn haearn
• Atafaelu ffonau symudol a dau gar hefyd

Roedd y gweithgareddau yn cynnwys gwarantau mewn dau gyfeiriad yng Nghasnewydd.

Dywedodd y Ditectif Arolygydd Ian Bartholomew: “Mae mynd i’r afael â llinellau cyffuriau a throseddau cysylltiedig yn flaenoriaeth i Heddlu Gwent. Rydym wedi ymrwymo i ddiogelu’r rhai hynny sydd mewn perygl o gael eu hecsbloetio a gwneud Gwent yn amgylchedd digroeso i’r rhai sy’n ceisio gwneud niwed.

“Mae canlyniadau gweithredu yr wythnos hon wedi bod yn hynod bositif o ran diogelu pobl agored i niwed yn ein cymunedau yn ogystal â’r arestiadau. Nid oes dim lle i gyffuriau anghyfreithlon yn ein cymdeithas a byddwn yn parhau i dargedu’r rhai hynny y mae eu gweithgareddau troseddol yn amharu ar fywydau cymunedau yng Ngwent.

“Rydym yn cydnabod nad yw mynd i’r afael â llinellau cyffuriau yn rhywbeth y gellir ei ddatrys gan yr heddlu yn unig. Rydym yn annog pobl ifanc, rhieni a chymuned ehangach Gwent i fod yn gyfarwydd ag arwyddion y gallai person ifanc fod mewn perygl o gael ei ecsbloetio ac i roi gwybod inni am eu pryderon. Mae arwyddion o ecsbloetio yn cynnwys plentyn ag arian nad yw’n gallu ei esbonio, ffôn neu ddillad drud newydd yn ogystal â mynd ar goll yn sydyn.

“Os oes gennych chi unrhyw bryderon bod rhywun yr ydych chi’n ei adnabod yn cael ei ecsbloetio neu os oes gennych unrhyw bryderon ynglŷn â chyflenwi cyffuriau, ffoniwch ni ar 101 neu 999 mewn argyfwng. Fel arall, gellir cysylltu â Crimestoppers yn ddienw ar 0800 555 111.”

Beth yw’r arwyddion y gallai person ifanc fod mewn perygl o gael ei ecsbloetio?

• Mynd ar goll o’r ysgol neu’r cartref
• Newidiadau mawr yn ei les emosiynol
• Cyfarfod â phobl anghyfarwydd
• Newidiadau yn ei ymddygiad
• Defnyddio cyffuriau ac alcohol
• Cael arian neu roddion drud nad yw’n gallu eu hesbonio
• Perthynas ag unigolion gormesol neu hŷn neu gysylltiad â gangiau
• Amheuaeth o hunan-niwed, ymosod corfforol neu anafiadau nad yw’n gallu eu hesbonio