Apêl am dystion yn dilyn gwrthdrawiad ar yr A465

Aeth swyddogion i safle gwrthdrawiad traffig ffyrdd rhwng car a gweithiwr ffordd ar ffordd Blaenau’r Cymoedd ger Tredegar ddydd Llun 22 Tachwedd.

Cawsom ein hysbysu am wrthdrawiad traffig ffyrdd ar yr A465 - ffordd Blaenau’r Cymoedd - ger Tredegar, tua 12.10pm dydd Llun 22 Tachwedd.

Roedd y gwrthdrawiad rhwng car a gweithiwr ffordd, a gafodd ei gymryd i Ysbyty Athrofaol Cymru yng Nghaerdydd i dderbyn triniaeth.

Dioddefodd y gweithiwr ffordd, dyn 24 oed, anafiadau i’w ben a’i goes. Mae mewn cyflwr sefydlog ond credir y gallai ei anafiadau fod yn rhai sy’n newid bywyd.

Arestiwyd dyn 37 oed o ardal Merthyr Tudful ar amheuaeth o achosi anaf difrifol drwy yrru peryglus a gyrru heb yswiriant. Mae wedi cael ei ryddhau tra bod ymchwiliad yn parhau.

Mae ymholiadau’n parhau ar hyn o bryd a gofynnir i unrhyw un â gwybodaeth a allai gynorthwyo ein hymchwiliad, gan gynnwys delweddau CCTV neu gamera car, ffonio 101, gan ddyfynnu rhif cofnod 2100409928.

Gallwch anfon neges uniongyrchol atom ar Facebook neu Twitter hefyd neu gallwch ffonio Crimestoppers yn ddienw ar 0800 555 111 gyda manylion.

Rydym wedi cysylltu â Swyddfa Annibynnol Ymddygiad yr Heddlu yn unol â’r trefniadau gweithredu safonol gan fod swyddogion yn ymlid cerbyd cyn y gwrthdrawiad.