Blog yr Arolygydd: Yr Arolygydd Andrew Boucher, Canol Caerffili

 

• Mynd i’r afael ag ymddygiad gwrthgymdeithasol.
• Sut mae eich adborth yn siapio plismona lleol.
• Ein ffocws yn ystod y misoedd i ddod.

 

Helo bawb,

Dyma fy mlog cyntaf fel eich arolygydd yn ardaloedd y Coed-duon a Rhisga.

Dros yr ychydig fisoedd diwethaf, ac yn wir drwy gydol y pandemig, mae ein timau plismona yn y gymdogaeth wedi bod yn gweithio’n hynod o galed i gadw’n cymunedau ni’n ddiogel – ac rydyn ni, fel tîm ac fel rhan o’r gymuned, wedi cyflawni llawer i fod yn falch ohono.

Ar hyn o bryd, rydyn ni’n rhedeg pedwar cynllun plismona sy’n ymateb i broblemau (POP) yn yr ardal.

Rhoddwyd y rhain ar waith yn dilyn yr adborth gawson ni gennych chi yn yr arolwg Eich Llais diwethaf (cadwch lygad am lansiad yr arolwg nesaf, a fydd yn rhoi cyfle i chi ddweud wrthon ni beth rydych chi’n ei feddwl am eich ardal chi yn nes ymlaen y mis yma).

Ar hyn o bryd, mae’r cynlluniau’n canolbwyntio ar y canlynol:

• ymddygiad gwrthgymdeithasol yng nghanol tref y Coed-duon
• ymddygiad gwrthgymdeithasol yng nghanol tref Trecelyn
• defnydd anghyfreithlon o feiciau oddi ar y ffordd yng Nghwm-carn
• defnydd anghyfreithlon o feiciau oddi ar y ffordd ym Manmoel. 

Rwy’n falch o ddweud bod troseddau ac ymddygiad gwrthgymdeithasol wedi bod yn is eleni o gymharu â blynyddoedd eraill, ac rwy’n credu bod hyn oherwydd ymrwymiad a gwaith caled ein timau, ein partneriaid a’n cymunedau.

Mae swyddogion yn y gymdogaeth wedi bod yn gweithio gyda Caerffili Mwy Diogel, y Gwasanaeth Troseddau Ieuenctid, gwirfoddolwyr ac ysgolion lleol i nodi ymyraethau ystyrlon ac i erlyn pobl sy’n euog o droseddau ac anhrefn yn yr ardal.

Mae’n flaenoriaeth gennym i ymdrin â’r broblem wrth ei gwraidd er mwyn atal troseddau rhag digwydd eto.

Rydyn ni’n defnyddio ystod o declynnau dadansoddol i nodi patrymau a materion sy’n codi, ac yna’n gweithio gyda phartneriaid i daclo’r rhain. Lle bo'n briodol, rydyn ni wedi bod yn defnyddio dulliau deddfwriaethol, fel hysbysiadau gwarchod y gymuned, gorchmynion ymddygiad troseddol, a gwaharddebau i atal aildroseddu. Byddwch wedi gweld sôn am hyn ar gyfrifon cymdeithasol Heddlu Gwent yn ddiweddar.

Er gwaetha’r gostyngiad cyffredinol yma, rydyn ni’n ymwybodol bod llawer o bobl yn dal i brofi ymddygiad gwrthgymdeithasol yn yr ardal.

Dros Galan Gaeaf, awdurdodais orchymyn gwasgaru yng nghanol tref y Coed-duon yn dilyn adroddiadau o anhrefn, ac rydyn ni wedi parhau â’n gwaith i daclo defnydd peryglus a niweidiol o gerbydau oddi ar y ffordd ar ein mynyddoedd, gan ymafael mewn dros hanner cant o gerbydau dros y chwe mis diwethaf.

Wrth i ni gyrraedd misoedd y gaeaf, bydd yr ymrwymiad yma’n parhau, ynghyd â’n gwaith i fynd i’r afael â thueddiadau tymhorol fel dwyn o siopau, llosgi bwriadol, byrgleriaeth a throseddau cerbydau.

Cadwch lygad am ein cyngor ar atal troseddu yn ystod y misoedd nesaf.

Fel bob amser, ar ran y tîm yn y Coed-duon a Rhisga, diolch am eich cefnogaeth barhaus.