40 o gerbydau wedi cael eu stopio yn rhan o ymgyrch i wasgu'n dynn ar droseddau moduro

Gwiriodd swyddogion 40 o gerbydau ac arestiwyd pedwar o bobl yn rhan o'r ymgyrch ddiweddaraf i wasgu'n dynn ar droseddau moduro.

Nod Ymgyrch Utah - diwrnod o weithredu amlasiantaeth – yw darganfod a mynd i'r afael â defnyddwyr ffyrdd sy'n rhoi modurwyr eraill mewn perygl - naill ai drwy yrru'n anghyfreithlon neu drwy yrru cerbydau nad ydynt o safon ddiogel.

Digwyddodd yr ymgyrch diogelwch ar y ffyrdd ddydd Mawrth 31 Awst yn safle profi a phont bwyso'r Asiantaeth Safonau Gyrwyr a Cherbydau ar gylchfan Coldra, Casnewydd.

Roedd yr ymgyrch yn cynnwys swyddogion o'r uned plismona ffyrdd, yr adran cŵn, tîm troseddau gwledig, tîm Dangos y Drws i Drosedd, yr heddlu gwirfoddol, swyddogion ymateb a gwirfoddolwyr staff yr heddlu.

Ymunodd swyddogion â phartneriaid o'r Asiantaeth Safonau Gyrwyr a Cherbydau, GanBwyll, y Gwasanaeth Cudd-wybodaeth Troseddau Cerbydau Cenedlaethol a The Equipment Register (TER).

Dyma a ddigwyddodd yn ystod diwrnod yr ymgyrch:

• • 40 o gerbydau wedi cael eu stopio
  • Pedwar dyn wedi cael eu harestio - dau ar amheuaeth o yrru dan ddylanwad cyffuriau, un ar amheuaeth o fod â sylwedd seicoweithredol yn ei feddiant gyda bwriad o gyflenwi a dyn yr oedd swyddogion eisiau siarad ag ef mewn cysylltiad ag ymchwiliad parhaus.
  • 19 adroddiad troseddau traffig (TOR) wedi cael eu cyflwyno gan gynnwys tri am gael llwyth peryglus, tri am beidio â gwisgo gwregys diogelwch, un am ddefnyddio ffôn symudol wrth y llyw a phedwar am ddiffyg yswiriant.
  • Pedwar cerbyd wedi cael eu hatafaelu am yrru heb drwydded neu yswiriant
  • Dau yrrwr wedi cael eu riportio am ddiffyg treth
  • Un trelar ac un car wedi'u dwyn wedi cael eu hadfeddiannu
  • Cofnododd GanBwyll 40 modurwr yn gyrru dros y terfyn cyflymder.
  • Cyhoeddodd yr Asiantaeth Safonau Gyrwyr a Cherbydau 22 gwaharddiad addasrwydd i'r ffordd fawr.

Dywedodd PC Sally Davies:

“Rydym wedi ymroi i wella diogelwch ar y ffyrdd i bawb sy'n defnyddio'r ffyrdd yng Ngwent ac mae Ymgyrch Utah yn un o'r ffyrdd rydym yn cymryd camau gweithredu i fynd i'r afael â throseddau moduro. Rwyf yn gobeithio y bydd canlyniadau'r ymgyrch hwn yn anfon neges glir bod gyrru'n anghyfrifol neu beidio â chynnal a chadw eich cerbyd yn annerbyniol a byddwn yn ymdrin yn gadarn â phobl sy'n gwneud hynny.

“Hoffwn ddiolch i'n partneriaid am weithio gyda ni i wneud y ffyrdd yn ein cymunedau mor ddiogel â phosibl.

“Mae gan bob un ohonom ran i'w chwarae i sicrhau diogelwch pobl eraill sy'n defnyddio'r ffyrdd - gofynnaf yn daer ar fodurwyr i yrru'n ofalus, yn gyfrifol ac o fewn cyfyngiadau'r gyfraith ac i sicrhau bod eu cerbydau'n cael eu cynnal a'u cadw'n dda trwy'r amser."