Apêl am dystion yn dilyn gwrthdrawiad yn Fochriw
Cynnwys y prif erthygl
Hoffai swyddogion siarad ag unrhyw fodurwyr oedd yn teithio trwy Fargoed, Deri a Fochriw rhwng 4.30am a 5.10am ddydd Sul 24 Gorffennaf.
Rydym yn apelio am wybodaeth i gynorthwyo ein hymholiadau i wrthdrawiad traffig angheuol yn Fochriw ddydd Sul 24 Gorffennaf.
Aeth swyddogion i adroddiad am wrthdrawiad traffig, ger Brook Row, tua 5.05am, a oedd yn cynnwys un cerbyd – Skoda Octavio llwydfelyn.
Cadarnhaodd parafeddygon Gwasanaeth Ambiwlans Cymru a oedd hefyd yn bresennol, fod merch, 17, o ardal Trecelyn – a oedd yn deithiwr yn y car – wedi marw yn y fan a’r lle.
Gallwn gyhoeddi bellach mai ei henw yw Chloe Hayman ac mae ei theulu wedi rhyddhau’r deyrnged ganlynol iddi:
“Allwn ni ddim credu bod ein merch brydferth a chariadus a chwaer ofalgar i dri brawd bach wedi ei chymryd mor ifanc.
“O’r diwrnod y cafodd Chloe ei geni, roedd yn ferch fach benderfynol a ffyrnig o gryf a oedd yn brydferth ar y tu mewn a’r tu allan.
“Roedd Chloe’n byw bywyd i’r eithaf a daeth â chymaint o lawenydd a hapusrwydd i fywydau pawb.
“’Roedd pob eiliad yn ddifyr pan oedd Chloe o gwmpas.
“Roedd Chloe’n dod â hapusrwydd a chariad gyda hi i bob man ac roedd pawb yn ei charu.
“Bydd colled fawr ar ei hôl gan bawb oedd yn ei hadnabod ac a gafodd y siawns i gwrdd â hi.
“Ni fydd ein bywydau byth yr un fath hebddi.”
Arestiwyd dyn 21 oed o Rymni ar amheuaeth o achosi marwolaeth drwy yrru’n beryglus a gyrru pan nad oedd yn ffit i yrru oherwydd diod.
Cafodd ei ryddhau yn ddiweddarach ar fechnïaeth amodol tra bod ymholiadau’n parhau ac rydym yn gofyn i unrhyw un â gwybodaeth am y gwrthdrawiad gysylltu â ni.
Rydym yn gofyn i unrhyw un a allai fod wedi gweld y gwrthdrawiad, sydd â lluniau CCTV, neu unrhyw fodurwyr â lluniau camera car ym Margod, Deri a Fochriw rhwng 4.30am a 5.10am gysylltu â ni.
Gallwch ein ffonio ar 101 neu anfon neges uniongyrchol atom ar Facebook neu Twitter, gan ddyfynnu rhif cofnod 2200247542 gydag unrhyw fanylion.
Fel arall, gallwch ffonio Crimestoppers yn ddienw ar 0800 555 111.