Cwnstabl yn cyfarfod merch o Gaerffili y gwnaeth helpu gyda’i genedigaeth

Mae Cwnstabl yr Heddlu Mark Powell wedi cael aduniad ag Imogen, y gwnaeth helpu gyda’i genedigaeth y tu allan i orsaf heddlu’r Coed-duon naw mlynedd yn ôl.

Mae swyddog o Heddlu Gwent wedi cael aduniad â merch o Faesycwmer – naw mlynedd ar iddo helpu gyda’i genedigaeth pan ddechreuodd ei mam esgor yn y Coed-duon.

Postiodd Cwnstabl Mark Powell neges ar dudalen Facebook gymunedol i ofyn sut oedd y fam a’i merch, ar ôl cael nodyn atgoffa o ben-blwydd y digwyddiad ar y cyfryngau cymdeithasol.

Ymatebodd Sara Jones i ddweud bod Imogen, sydd bellach yn naw oed, yn gwneud yn dda a gwahoddodd Cwnstabl Powell i gyfarfod â nhw.

Mae Imogen wedi clywed hanes ei genedigaeth lawer gwaith ac mae ganddi doriadau papur newydd o’r diwrnod hapus ond anodd i’w mam. 

Roedd Sara o Faesycwmer, yn teithio gyda’i mam yng nghyfraith a’i thad yng nghyfraith i Ysbyty Brenhinol Gwent yng Nghasnewydd pan ddechreuodd golli dŵr.

Fe wnaethant stopio y tu allan i’r orsaf heddlu yn y Coed-duon lle gwnaeth dau swyddog yr heddlu – Cwnstabl Powell a Chwnstabl Helen Moss – helpu i eni Imogen.

Arweiniodd Cwnstabl Powell y gwaith o eni Imogen tra bod Cwnstabl Moss yn cynorthwyo’r ddarpar fam ac yn dal ei llaw.

Mae’n cofio bod Imogen fach yn ‘las’ wrth iddi ddod allan, ac roedd y llinyn bogail wedi’i lapio o amgylch ei gwddf. Tynnodd Cwnstabl Moss y llinyn oddi ar wddf y babi tra bod Cwnstabl yn annog Imogen i gymryd ei hanadl cyntaf.

Meddai Cwnstabl Mark Powell:

“Roedden i eisiau cysylltu i weld sut oedd y fam a’r ferch.

“Er nad yw’n rhywbeth sy’n digwydd bob dydd, rwyf i wedi cael y pleser o esgor mwy nag un babi ond mae pob un yn brofiad sy’n aros gyda chi am byth.  

“Mae’n wych gweld pa mor dda y mae Imogen yn gwneud, yn enwedig ar ôl iddi roi cymaint o fraw i ni.”

Meddai Sara:

“Roeddwn i wedi bod yn siopa ac yn gallu teimlo poen yn fy nghefn.

“Fe wnaethon ni ffonio tad Imogen i roi gwybod iddo ond roedd hi’n rhy hwyr i ffonio’r ambiwlans ac felly fe aethon ni i’r car a chychwyn am yr ysbyty. Wnaethon ni ddim mynd yn bell iawn a bu’n rhaid i ni stopio yng Ngorsaf Heddlu y Coed-duon.

“Nid wyf i’n gallu cofio llawer; roedd popeth yn niwl braidd – ond rwy’n cofio Cwnstabl Moss yn dal fy llaw ac yn fy nghysuro."

Ychwanegodd Sara bod Imogen, sy’n mynychu Ysgol Gynradd Maesycwmer, yn gefnogwr pêl-droed brwd ac yn mwynhau chwarae pêl-droed gyda’i thad a’i brawd.

Meddai Cwnstabl Helen Moss:

“Roedd yn brofiad hyfryd helpu i ddod a bywyd newydd i’r byd ac i gael diweddglo hapus gyda’r fam a’r babi yn ddiogel ac yn iach.”