Gwobr dewrder i aelod o’r cyhoedd am helpu dyn oedd wedi cael ei drywanu

Mae aelod o’r cyhoedd a helpodd ddyn oedd wedi cael ei drywanu wedi ennill gwobr genedlaethol am ddewrder gan Gyngor Cenedlaethol Penaethiaid yr Heddlu.

Cyflwynwyd Gwobr Dewrder y Cyhoedd i William Boulter, 22 oed o Gasnewydd, gan y Prif Gwnstabl Pam Kelly. Mae gwobr dewrder Cyngor Cenedlaethol Penaethiaid yr Heddlu yn cydnabod aelodau’r cyhoedd am weithredoedd sy’n cefnogi’r heddlu wrth iddynt gynnal cyfraith a threfn.

Ar 14 Mehefin 2019, rhedodd Mr Boulter ar draws y ffordd i helpu dyn oedd yn dioddef ymosodiad gan ddyn gyda chyllell y tu allan i Ganolfan Gap, Stow Hill, Casnewydd. Cafodd y dioddefwr, a oedd yn 27 oed ar y pryd, ei drywanu sawl gwaith yn ystod yr ymosodiad.

Aeth Mr Boulter, 22 oed, ati i gynorthwyo’r dioddefwr i gael gofal meddygol gyda chymorth modurwr a oedd yn mynd heibio ar y pryd a yrrodd y dyn i’r ysbyty. Cyrhaeddodd swyddogion yn fuan wedyn a gallodd Mr Boulter ddweud wrthyn nhw pwy oedd yr ymosodwr.

Carcharwyd y dyn a oedd wedi ymosod ar y dioddefwr am 12 mlynedd ym mis Rhagfyr 2019.

Derbyniodd Mr Boulter wobr dewrder y cyhoedd yng Ngwobrau Heddlu Gwent ym mis Tachwedd 2021 hefyd.

Meddai Prif Gwnstabl Pam Kelly:

“Diolch i weithredoedd dewr William ac aelodau eraill y cyhoedd a ddaeth i helpu’r dioddefwr, llwyddwyd i achub bywyd. Gallai canlyniadau’r digwyddiad hwn fod wedi arwain at drasiedi yn hawdd iawn.

“Roedd yn fraint go iawn cyflwyno gwobr genedlaethol am ddewrder i William. Hoffwn ddiolch iddo am ei ddewrder a’i dosturi yn cynorthwyo’r dyn oedd wedi’i anafu a’i ymroddiad yn cefnogi’r ymchwiliad. Mae William yn ddyn ifanc arbennig iawn.”