Cyngor ar gyfer gyrwyr

Rydyn ni’n ymwybodol o brotest sydd wedi cael ei threfnu ar y rhwydwaith ffyrdd rhwng 7am a 7pm ddydd Llun 4 Gorffennaf.

Mae trefnwyr wedi awgrymu eu bod yn bwriadu rhwystro Pont Tywysog Cymru, a bydd y brotest yn dechrau ar yr M4 ger gwasanaethau Magwyr, cyffordd 23A tua’r dwyrain a chyffordd 20 yr M5 tua’r gorllewin.

Dywed Prif Uwch-arolygydd Tom Harding, sy’n arwain yr ymgyrch blismona:

“Mae Heddlu Gwent a Heddlu Avon a Gwlad yr Haf yn cydweithio gyda lluoedd cyfagos ac asiantaethau partner i sicrhau bod gwasanaethau brys a chritigol yn parhau, ac i leihau unrhyw darfu ar ddefnyddwyr y ffyrdd a chymunedau lleol. Fodd bynnag, rydyn ni’n paratoi ar gyfer tarfu difrifol trwy gydol y dydd.

“Hoffwn annog gyrwyr i ail ystyried eu siwrnai, ystyried gweithio gartref ac osgoi’r ardal lle bynnag y bo’n bosibl.

“Rhaid cydbwyso’r hawl i brotestio dan gyfraith y DU gyda hawliau’r gymuned ehangach a all gael ei heffeithio. Bydd gennym ni swyddogion a chefnogaeth ychwanegol ddydd Llun i sicrhau bod y brotest yn cael ei chynnal yn unol â’r gyfraith.”