Mwy na 40 o droseddau wedi'u canfod ar yr M4

Swyddogion yn defnyddio HGV heb ei farcio i fynd i'r afael â defnydd peryglus o ffyrdd fel rhan o Ymgyrch Tramline.

Dychwelodd swyddogion i gaban HGV heb ei farcio yr wythnos diwethaf fel rhan o ymgyrch i fynd i'r afael â throseddau moduro ar yr M4.

Fel rhan o Ymgyrch Tramline, menter diogelwch ar y ffyrdd genedlaethol, roedd swyddogion o'n hadran plismona ffyrdd ac ymgyrchoedd arbenigol ac uned ymchwilio i wrthdrawiadau fforensig yn nodi enghreifftiau o yrru anghyfreithlon neu anniogel.

Cafodd gyrwyr a gafodd eu gweld yn cyflawni trosedd, er enghraifft defnyddio ffôn symudol neu beidio â gwisgo gwregys ddiogelwch, eu stopio yn ddiweddarach gan swyddogion.

Cynhaliwyd yr ymgyrch rhwng cyffyrdd 22 a 30 yr M4, rhwng dydd Llun 14 a dydd Iau 17 Mawrth.

Canfuwyd mwy na 40 o droseddau moduro ar y draffordd yn ystod yr ymgyrch wnaeth bara bedwar diwrnod:

• Cyflwynwyd 22 o adroddiadau troseddau traffig am beidio â gwisgo gwregys ddiogelwch
• Cyflwynwyd 11 o adroddiadau troseddau traffig am ddefnyddio ffôn symudol
• Cyflwynwyd chwe adroddiad trosedd traffig am yrru heb fod dan reolaeth briodol neu yrru heb ofal a sylw dyladwy
• Roedd troseddau eraill yn cynnwys llwythi heb eu diogelu’n briodol a gyrwyr yn tynnu cerbyd arall yn y drydedd lôn (faint).

Dywedodd PC Matt Rue: "Mae'n rhaid i fodurwyr feddwl am ganlyniadau eu gweithredoedd - gall tynnu eu sylw oddi ar y ffordd am eiliad newid bywydau diniwed. Dyw'r risg byth werth ei chymryd.

"Mae'r HGV yn arf defnyddiol gan ei fod yn rhoi cyfle i'n swyddogion nodi modurwyr a allai fod yn cyflawni trosedd o safle uwch.

"Rydym wedi ymrwymo i wella diogelwch holl ddefnyddwyr y ffordd yng Ngwent ac mae ymgyrchoedd fel hyn yn un o'r ffyrdd yr ydym yn cymryd camau i fynd i'r afael â'r mathau hyn o droseddau moduro.

"Rwy'n gobeithio bod canlyniadau'r ymgyrch hon yn anfon neges glir bod gyrru anghyfrifol yn annerbyniol ac y bydd camau pendant iawn yn cael eu cymryd yn eich erbyn."