Inspector’s blog: Shane Underwood, Blaenau Gwent

Yn fy mlog diwethaf, fe wnes i ddiolch i chi – cymunedau Blaenau Gwent – am y ffordd y daethoch at eich gilydd drwy gydol pandemig y Coronafeirws.

Yn fy mlog diwethaf, fe wnes i ddiolch i chi – cymunedau Blaenau Gwent – am y ffordd y daethoch at eich gilydd drwy gydol pandemig y Coronafeirws.

Er ein bod yn dal i fyw â'r feirws heddiw, oherwydd codi'r cyfyngiadau, rydym bellach yn gallu ailddechrau'r digwyddiadau ymgysylltu wyneb yn wyneb y gwnaethom weld eu heisiau drwy gydol y pandemig.

Edrychaf ymlaen felly at gyfnod yr haf gan ragweld rhaglen lawn o ddigwyddiadau cymunedol gan gynnwys dathlu Jiwbilî'r Frenhines ym mis Mehefin.

Mae'r digwyddiadau pwysig hyn yn rhoi cyfleoedd i'n cymunedau ddod at ei gilydd; bydd eich timau plismona lleol yn ymwneud yn helaeth â chefnogi'r achlysuron hyn ac edrychwn ymlaen at siarad â chi dros y misoedd nesaf.

Ni allwn anwybyddu sut y mae costau byw cyffredinol yn effeithio ar bob un ohonom, gan roi pwysau ariannol ychwanegol ar unigolion a theuluoedd ym mhob rhan o’n cymunedau.

Gall hyn, yn anffodus, effeithio ar droseddu hefyd – yn enwedig troseddau sy'n gysylltiedig â dwyn yn ystod y misoedd cynhesach, lle mae lladron manteisgar yn ceisio manteisio.

Rydym yn dadansoddi tueddiadau troseddu bob dydd, wrth gwrs, ac, wrth i ni nesáu at gyfnod yr haf a thywydd cynhesach (lle rydym yn gweld cynnydd ystadegol mewn lladrata), rydym yn parhau i weithio'n galed i adnabod troseddwyr, a chefnogi ymyriadau sy'n lleihau aildroseddu.

Mae'r rhan fwyaf o droseddau dwyn yn fanteisgar eu natur ac, yn y rhan fwyaf o achosion, mae camau syml y gall pawb eu cymryd i helpu i ddiogelu eu heitemau gwerthfawr.

Gall pethau fel sicrhau eich bod yn cloi eich cerbyd, peidio â gadael eitemau ar y dash neu'r sedd gefn lle gall pawb eu gweld a chau pob ffenestr atal lladrata o gerbyd, a gall defnyddio datrysiadau marcio eiddo, cloeon o ansawdd da a chynwysyddion y gellir eu cloi helpu i gadw eitemau sy'n cael eu storio mewn siediau a garejys yn ddiogel.

Os oes angen unrhyw gyngor neu arweiniad arnoch ar sut i ddiogelu eich eiddo, cysylltwch ag aelod o'n tîm plismona lleol, a fydd yn fwy na pharod i helpu. Fel arall, gallwch ymweld â'n gwefan, anfon e-bost i [email protected] neu fynd i un o'n cymorthfeydd heddlu.

Cymorthfeydd yr heddlu, dywedwch . . . beth ydyn nhw?

Wel, yn syml, mae'r rhain yn gyfleoedd gwych i chi siarad yn uniongyrchol â'ch tîm plismona lleol. Byddwch yn gallu cwrdd â'r swyddogion sy'n gweithio yn eich cymdogaethau, siarad am unrhyw bryderon sydd gennych a gofyn am gymorth neu arweiniad am faterion rydych chi'n eu hwynebu.

Yn ogystal â bod yno i siarad am ein gwaith, yr hyn yr ydym yn ei wneud i fynd i'r afael â'ch pryderon a thawelu'ch meddwl, mae'r cymorthfeydd hefyd yn ddefnyddiol iawn i ni o ran casglu gwybodaeth hanfodol. Mae gwybodaeth a gawn gennych chi, y gymuned, yn hanfodol i'n galluogi i ddeall yn iawn beth yw'r materion gwirioneddol sy'n effeithio'n uniongyrchol ar drigolion – sy'n golygu y gallwn lunio ein gweithgareddau gorfodi yn uniongyrchol o amgylch y pryderon hyn.

Cynhelir cymorthfeydd yr heddlu mewn amrywiaeth o leoedd – ond, yn bwysicaf oll, dylid eu cynnal mewn lleoliadau sy'n hygyrch i gynifer o bobl â phosibl. Os oes gennych unrhyw leoliadau penodol a fyddai'n elwa ar gynnal cymhorthfa heddlu yn eich barn chi, cysylltwch â'ch tîm plismona lleol [insert contact].

Byddwn yn parhau i hysbysebu cymorthfeydd a gynhelir ledled Blaenau Gwent drwy gyfrif Twitter eich swyddogion (@GPBlaenauGwent) ac yn yr adran digwyddiadau ar y dudalen Facebook (@heddlugwent).

Yn ogystal â rhoi'r wybodaeth ddiweddaraf i chi am gymorthfeydd a digwyddiadau sydd ar y gweill, mae ein cyfrif Twitter hefyd yn rhoi cipolwg i chi o waith eich timau plismona lleol – felly po fwyaf o bobl y gallwn ni gofrestru a'n dilyn, gorau oll!

Ar wahân i fynd i'r afael yn uniongyrchol â throseddu ac ymddygiad gwrthgymdeithasol, mae'r timau cymdogaeth hefyd yn cymryd rhan mewn nifer o weithgareddau eraill sydd wedi'u cynllunio i gadw pobl yn ddiogel a lleihau troseddu/ymddygiad gwrthgymdeithasol.

Mae ein gweithgareddau ychwanegol diweddar yn cynnwys:

Ymgyrch diogelwch gwregysau diogelwch

Yn ddiweddar, cynhaliodd tîm ward Glynebwy, mewn cydweithrediad â Gwasanaeth Tân ac Achub De Cymru, ymgyrch diogelwch gwregysau diogelwch.

Prif nod y fenter oedd addysgu gyrwyr am beryglon peidio â gwisgo gwregys diogelwch wrth deithio.

Digwyddiad marcio trawsnewidyddion catalytig

Cynhaliodd swyddogion Abertyleri ddigwyddiad marcio trawsnewidyddion catalytig yn y Ganolfan MOT ar Stryd y Bont.

Galwodd llawer o bobl draw, ac roedd nifer o aelodau'r cyhoedd wedi gallu cael eu trawsnewidyddion catalytig wedi'u marcio â SmartWater ar y diwrnod.

Mae SmartWater yn rhoi cyfleoedd fforensig i'r heddlu (i adnabod troseddwyr) pe bai'r trawsnewidydd catalytig yn cael ei ddifrodi neu ei ddwyn. Gwnaethom hefyd ddarparu sticeri ar gyfer eu cerbydau i ddangos bod SmartWater wedi'i ddefnyddio – sy'n rhwystr y profir ei fod yn lleihau troseddu.

Gwarchod Siopau

Gweithiodd tîm Brynmawr gyda manwerthwyr lleol i gyflwyno cynllun newydd i atal troseddu Gwarchod Siopau. Bydd y prosiect yn helpu partneriaid i rannu gwybodaeth/cudd-wybodaeth a chydlynu gweithgarwch patrol – gyda'r nod o atal dwyn ac ymddygiad gwrthgymdeithasol.

Drwy gydweithio â phartneriaid, gan gynnwys Cyngor Bwrdeistref Sirol Blaenau Gwent a’n tîm NXT GEN ein hunain, fe wnaethom greu rhwydwaith sy'n cefnogi canol tref Brynmawr ac ardal y parc manwerthu gerllaw.

Cadw pobl ifanc yn ddiogel ar-lein

Cynhaliodd tîm Tredegar wers diogelwch ar y rhyngrwyd gyda blynyddoedd pump a chwech yn Ysgol Gynradd Willowtown, gan ddangos sut y gall y plant gadw’n ddiogel ar-lein a'r peryglon o ryngweithio â dieithriaid drwy lwyfannau cymdeithasol digidol.

Diolch am eich cefnogaeth barhaus.

Arolygydd Shane Underwood