Apêl am dystion yn dilyn gwrthdrawiad yng Nghasnewydd

Hoffai swyddogion sy’n ymchwilio i’r gwrthdrawiad siarad ag unrhyw un a oedd yn Christchurch Road, Casnewydd rhwng 7pm a 8pm ddydd Sul 1 Mai.

Rydym yn apelio am dystion ar ôl derbyn adroddiad am wrthdrawiad traffig ffyrdd yn Christchurch Road, Casnewydd tua 7.15pm ddydd Sul 1 Mai.

Aeth swyddogion allan i gynorthwyo i reoli traffig, ynghyd â pharafeddygon o Wasanaeth Ambiwlans Cymru.

Roedd y gwrthdrawiad rhwng dau gar - Citroen C3 a Volkswagen Polo - a gwrthdarodd y Polo gyda wal hefyd.

Aethpwyd â dau o bobl – dyn 22 oed a menyw 21 oed o Gasnewydd, y ddau ohonynt yn teithio yng nghefn y Polo – i Ysbyty Athrofaol Cymru yng Nghaerdydd i gael triniaeth.

Cafodd y dyn anaf i’w ben a chafodd y fenyw anaf i’w chefn.

Mae’r ddau mewn cyflwr sefydlog yn yr ysbyty ond gallai eu hanafiadau fod yn rhai sy’n newid bywyd.

Ni chafodd y teithiwr yn sedd flaen y Polo, dyn 24 oed o Gasnewydd, ei anafu.

Yn ôl pob sôn, gadawodd gyrrwr y Polo, dyn yn ei ugeiniau, y safle yn dilyn y gwrthdrawiad ac mae ymholiadau’n parhau i ganfod y person hwn er mwyn iddo ein helpu gyda’n hymchwiliad.

Yn ôl y disgrifiad mae o hil gymysg, tua 5’ 9” o daldra ac roedd yn gwisgo siaced “puffa” glas golau gyda llewys glas tywyll, esgidiau du a throwsus du.

Rydym yn apelio ar unrhyw un â gwybodaeth, gan gynnwys delweddau CCTV neu gamera car, i gysylltu â ni.

Yn ôl y sôn, gwelwyd y Polo yn y maes parcio yn nhafarn y Bull yng Nghaerllion tua 5pm ddydd Sul 1 Mai.

Hoffem siarad â’r dyn hwn a welwyd yn yr ardal ar y pryd a all fod â gwybodaeth am y bobl a oedd yn teithio yn y car.

Hoffai swyddogion sy’n ymchwilio i’r gwrthdrawiad siarad ag unrhyw un a oedd yn Christchurch Road rhwng 7pm a 8pm ddydd Sul 1 Mai.

Gall unrhyw un â manylion ffonio 101 neu anfon neges uniongyrchol atom ar gyfryngau cymdeithasol, gan grybwyll rhif cofnod 2200144212.

Gallwch gysylltu â Crimestoppers yn ddienw hefyd trwy ffonio 0800 555 111.