Heddlu Gwent yn cefnogi prosiectau ieuenctid yn Alway

Mae tri phrosiect ymgysylltu ag ieuenctid ar waith yn Alway, Casnewydd, i geisio taclo ymddygiad gwrthgymdeithasol, gwella ymwybyddiaeth o ganlyniadau troseddau cyllyll a cham-fanteisio ar blant, a meithrin cysylltiadau cadarnhaol â’r heddlu.

Ailddechreuodd dri phrosiect ymgysylltu ag ieuenctid, a gyflawnwyd gan Heddlu Gwent a Gwasanaeth Cyfiawnder Ieuenctid Casnewydd, yn ystod wythnos hanner tymor.

Nod y mentrau, sydd wedi’u hariannu’n rhannol drwy arian y mae Heddlu Gwent a phartneriaid wedi’i sicrhau oddi o gronfa Strydoedd Saffach y Swyddfa Gartref, yw meithrin cysylltiadau cadarnhaol rhwng yr heddlu a phobl ifanc, datblygu sgiliau bywyd a gwella ymwybyddiaeth o effaith trais a throseddau cyllyll ar ddioddefwyr a'r gymuned ehangach.

Dywedodd y Prif Arolygydd Hannah Lawton, sy’n arwain gwaith Strydoedd Saffach Gwent:

“Mae Heddlu Gwent wedi ymrwymo i daclo ymddygiad gwrthgymdeithasol, trais a throseddau cyllyll, ac yn parhau i ymgysylltu â chymunedau ledled Gwent i amddiffyn pobl agored i niwed a chodi ymwybyddiaeth o effaith ymddygiad gwrthgymdeithasol a throseddau trais ar gymunedau.”

Yn gynharach y mis hwn, gosodwyd Yr Angel Cyllyll, cerflun enfawr wedi’i wneud o fwy na 100,000 o gyllyll, yn Friars Walk, Casnewydd, i atgoffa pobl am effaith ddinistriol trais ac ymddygiad ymosodol ac annog trafodaeth ynglŷn ag effaith troseddau cyllyll.

Ychwanegodd CI Lawton:

“Mae’n bwysig bod ymgysylltiad ac addysg ar y pynciau hyn yn dechrau ar oedran ifanc, felly gellir defnyddio’r cyllid ychwanegol a gawn o’r prosiect Strydoedd Saffach i gefnogi’r tri phrosiect yn Alway a’n helpu i daclo ymddygiad gwrthgymdeithasol, ymgysyllti â’r rhai sydd mewn perygl o droseddu, ac atal troseddau treisgar.

“Mae gweithdai The Blade Project a gyflwynir gan ein tîm NXT GEN a phartneriaid y Gwasanaeth Cyfiawnder Ieuenctid, yn amlygu risgiau troseddau cyllyll, yn addysgu pobl am effaith troseddau cyllyll, sut i ddarparu cymorth cyntaf, a chaniatáu i’r rhai sy’n cwblhau’r cwrs gyflawni cymwysterau addysgol.

“Yn y cyfamser, mae’r fenter REALL Girls, yn grŵp holl gynhwysol i ferched ifainc sy’n byw yn Alway, gyda’r nod o’u hatal rhag cymryd rhan mewn ymddygiad gwrthgymdeithasol, eu hamddiffyn rhag cam-fanteisio ac yn codi ymwybyddiaeth o arwyddion rhybudd o gam-drin.

“Mae’r prosiect Soul Trail, y trydydd sydd wedi’i gefnogi gan gyllid Strydoedd Saffach, yn darparu gweithdai i bobl ifanc ac yn canolbwyntio ar fagu hyder ac ysbryd cymunedol a chyflwyno adnoddau a all helpu i wella llesiant personol.

“Mae’r gweithdai’n cynnwys sesiynau ymgysylltu â natur sy’n ceisio datblygu cysylltiad rhwng pobl ifanc, eu hamgylchedd a’r gymuned, ac addysgu cyfranogion am ba bethau, fel maeth, all gael effaith gadarnhaol ar iechyd a ffordd o fyw gyffredinol.”

Dywedodd y Cynghorydd James Clarke, aelod cabinet dros gynllunio strategol, rheoleiddio a thai yng Nghyngor Dinas Casnewydd:

“Trwy ein partneriaeth Casnewydd Saffach, mae’r cyngor, yr heddlu a phartneriaid eraill yn cydweithio i wella diogelwch y gymuned, ac rwy’n falch ein bod wedi gallu cydweithredu unwaith eto ar gylch arall o gyllid Strydoedd Saffach, yn dilyn ymyraethau blaenorol yng nghanol y ddinas a Philgwenlli.

“Mae ymgysylltu â phobl ifanc yn hanfodol os ydym am daclo ymddygiad gwrthgymdeithasol. Mae’r mentrau hyn yn enghreifftiau gwych o brosiectau cadarnhaol a all gwneud gwahaniaeth gwirioneddol i bobl ifanc, ac rwy’n falch ein bod wedi gallu eu cefnogi yn eu gwaith pwysig, ac yn gobeithio cael effaith gadarnhaol barhaol yn y gymuned leol.”

Bydd rhan o’r £746,702 a gafodd Heddlu Gwent yn ystod y cylch Strydoedd Saffach diweddaraf, sy’n cael ei ddefnyddio i helpu i atal ymddygiad gwrthgymdeithasol a throseddau cymdogaeth fel bwrgleriaeth, lladrata a dwyn ar draws chwe ardal yng Ngwent (Alway yng Nghasnewydd, y Coed Duon, Brynmawr, Cil-y-coed, Cwmbrân a Thredegar) hefyd yn cael ei defnyddio ar brosiectau ymgysylltu ag ieuenctid yng Nghwmbrân, Brynmawr a Thredegar.

I gael gwybod mwy am waith Strydoedd Saffach Heddlu Gwent, ewch i https://www.gwent.police.uk/cy-GB/heddluoedd/heddlu-gwent/ardaloedd/ymgyrchoedd/ymgyrchoedd/2021/safer-streets/.