Gwent yn cefnogi ymgyrch genedlaethol sy’n mynd i’r afael â throseddau cyllyll

Mae heddiw (dydd Llun 14 Tachwedd) yn nodi dechrau Ymgyrch Sceptre, sef wythnos genedlaethol o weithredu i fynd i’r afael â throseddau cyllyll a thrais difrifol.

Drwy gydol yr wythnos, bydd swyddogion Gwent yn cynnal patrolau rhagweithiol ar draws ardal yr heddlu ac yn rhoi cyflwyniadau addysgiadol mewn ysgolion i godi ymwybyddiaeth o’r effaith ddinistriol y gall troseddau cyllyll a thrais difrifol ei chael ar gymunedau.

Bydd swyddogion hefyd yn ymweld â siopau ledled y wlad i drafod y cynllun gwerthwyr cyfrifol – menter a sefydlwyd y llynedd i sicrhau bod gan fanwerthwyr wiriadau cadarn ar waith i sicrhau y caiff cyllyll eu gwerthu’n ddiogel ac i bobl dros 18 oed yn unig.

Fel rhan o’r ymgyrch, mae biniau amnest hefyd wedi’u gosod mewn pum gorsaf heddlu yng Ngwent, sy’n caniatáu i bobl gael gwared â chyllyll yn ddiogel ac yn ddienw heb fod ofn cael eu herlyn.

Bydd y biniau yn y gorsafoedd canlynol:

• Canol Casnewydd 8am – 7pm
• Trefynwy 9am – 1pm a 2pm – 4pm
• Coed-duon 9am – 1pm a 2pm – 4pm
• Glynebwy 9am – 1pm a 2pm – 4pm
• Cwmbrân 9am – 1pm a 2pm – 4pm.

Gofynnir i’r cyhoedd becynnu’r llafn cyn cael gwared â nhw yn y biniau fel bod modd eu tynnu oddi yno’n ddiogel.

Meddai’r Arolygydd Richard Tovey:

“Mae pob cyllell sy’n cael ei thynnu oddi ar y stryd yn gallu atal bywyd rhag cael ei golli, ac rydyn ni’n ymroddedig i fynd i’r afael â phob math o droseddau cyllyll a thrais difrifol.

“Yn ystod wythnos weithredu Ymgyrch Sceptre, byddwn ni’n ymgysylltu â’n cymunedau i godi ymwybyddiaeth o beryglon a chanlyniadau troseddau cyllyll.

“Eleni, mae’r wythnos yn digwydd tra bod cerflun yr Angel Cyllyll yng Nghasnewydd, ac mae addysg yn rhan bwysig o dynnu sylw at beryglon cario cyllyll.

“Byddwn ni’n ymweld ag ysgolion i siarad gyda disgyblion; bydd siarad gyda nhw ar oedran ifanc yn dangos iddyn nhw y peryglon mae cyllyll yn eu hachosi i’n cymunedau ac yn y pen draw yn atal troseddu.

“Er ein bod ni’n canolbwyntio ar droseddau cyllyll yn ystod Ymgyrch Sceptre, mae mynd i’r afael â throseddau cyllyll yn rhan o waith plismona bob dydd.

“Mae ein swyddogion yn cynnal patrolau ar sail cudd-wybodaeth yn rheolaidd er mwyn atal troseddu ac amlygu’r bobl a allai gyflawni trosedd dreisgar.

“Does dim esgusodion pam ddylai rhywun gario cyllell.

“Bydd unrhyw un sy’n cario cyllell, waeth beth yw’r rheswm, yn cael eu stopio, eu chwilio, a bydd yr arf yn cael ei dynnu o’n cymunedau.”

Os oes gan unrhyw un wybodaeth am bobl sy’n rhan o droseddau cyllyll neu unrhyw bryderon, ffoniwch ni ar 101 neu anfonwch neges uniongyrchol aton ni drwy Facebook neu Twitter. Fel arall, gallwch ffonio Crimestoppers yn ddi-enw ar 0800 555 111. Ffoniwch 999 mewn argyfwng bob amser.