Dewch i gwrdd â'ch tîm troseddau meddiangar lleol

Heddiw rydyn ni'n lansio ein blog misol newydd ar gyfer ein tîm Dangos y Drws i Drosedd (DYDID).

Bydd ein blogiau DYDID misol yn rhoi cipolwg i chi ar waith y tîm, y gwaith mae'n ei wneud gyda phartneriaid a sut rydyn ni'n gweithio i fynd i'r afael â throseddau meddiangar.

Byddwn hefyd yn dathlu'r gwasanaethau hanfodol sy'n cael eu cynnig i'ch cefnogi chi, dioddefwyr trosedd, a'n cymunedau ehangach.

Yn y rhifyn cyntaf hwn, rydyn ni'n canolbwyntio ar y gwaith pwysig mae'r tîm wedi bod yn ei wneud ledled Gwent. Ym mis Medi cafwyd cwymp nodedig yn nifer y troseddau meddiangar ledled Gwent - gan gynnwys lleihad mewn byrgleriaeth preswyl, byrgleriaeth masnachol, troseddau cerbydau, dwyn o siopau a lladrad.

Mae'r tîm Dangos y Drws i Drosedd wedi bod yn gweithio'n galed gyda thrigolion ledled Gwent yn:

• cynnal cymorthfeydd atal trosedd rheolaidd
• cynnig hylif marcio eiddo fforensig SmartWater am ddim i'w ddefnyddio ar eitemau fel offer, beiciau, e-feiciau, troswyr catalytig
• rhoi offer marcio fforensig masnachol, cyngor atal trosedd, adolygiadau diogelwch ac arwyddion atal trosedd i fusnesau lleol
• rhoi sesiynau hyfforddiant am ddim i godi ymwybyddiaeth pobl o gam-fanteisio a sut i'w riportio
• rhoi offer marcio eiddo fforensig Smartwater, cyngor atal trosedd a chymorth i ddioddefwyr trosedd
• defnyddio dyfeisiau i adnabod ac erlyn lladron sy'n targedu ein cymunedau
• defnyddio gallu dadansoddol y tîm i gysylltu troseddwyr gyda throseddau ledled Gwent.

Hyd yn hyn, mae'r tîm wedi adennill gwerth £152,447 o eiddo diolch i farcio fforensig ac wedi hyfforddi dros 1,000 o bobl i adnabod arwyddion troseddau meddiangar.

Meddai Arolygydd Carl Morgan:

"Mae'r tîm DYDID yn defnyddio amryw o dechnegau i fynd i'r afael â throseddau meddiangar difrifol a threfnedig yn defnyddio technoleg fel SmartWater ac asedau cudd.

"Nod yr adran yw targedu'r troseddwyr mwyaf mynych sy'n achosi'r niwed mwyaf i'n cymunedau, a gwneud ein cymdogaethau'n llefydd diogel i fyw ynddynt.

"Rydyn ni'n gobeithio y bydd y blog hwn yn helpu pobl i amddiffyn eu hunain, ac eraill, rhag troseddau meddiangar."

Ar gyfer wythnos genedlaethol troseddau busnes, aeth y tîm i ymweld â dros 45 o fusnesau a danfon 37 pecyn atal trosedd.

Roedd SmartWater yn y pecynnau, sef technoleg marcio fforensig. Mae'n galluogi perchnogion busnes i farcio eu heitemau, wedyn os byddant yn cael eu dwyn, byddwn yn gallu eu hadnabod nhw wrth y marciau.

Croesawodd y tîm Gwnstabl Heddlu Helen Moss fel swyddog busnes. Un o'i gorchwylion cyntaf gyda'r tîm oedd ymweld ag eglwys ar ôl byrgleriaeth.

Rhoddodd Cwnstabl Heddlu Moss gyngor atal trosedd a phecynnau gyda SmartWater am ddim i'r clerigwyr.



Rhan o waith tîm DYDID yw hyfforddi aelodau'r gymuned. Mae ein hyfforddwyr yn creu pecynnau pwrpasol er mwyn hyfforddi gwahanol gynulleidfaoedd a sectorau.

Yn gynharach yn y mis, rhoddodd ein hyfforddwyr ymwybyddiaeth o drosedd hyfforddiant i'r tîm Helping Caring i adnabod arwyddion cam-fanteisio ar oedolion.



Ein partneriaid, digwyddiadau a'r gymuned.

Mae tîm DYDID yn gweithio ochr yn ochr â phartneriaid gydol y flwyddyn i adnabod tueddiadau trosedd, sicrhau bod gwaith atal yn ei le, cefnogi dioddefwyr trosedd ac adnabod y bobl sy'n eu cyflawni nhw yn ein cymunedau.

I gael mwy o wybodaeth am y digwyddiadau sydd ar y gweill ganddyn nhw ac i wybod lle maen nhw yn y gymuned, dilynwch y tîm ar Twitter neu ewch i'w tudalen ar ein gwefan.

Os hoffech chi ddysgu mwy am sut gall y tîm eich helpu chi, anfonwch e-bost at WeDon'[email protected].

Os ydych chi'n gweld trosedd yn cael ei chyflawni, ffoniwch 101, defnyddiwch ein system riportio ar-lein, neu anfonwch neges atom ni ar Facebook a Twitter.

Ffoniwch 999 bob tro mewn argyfwng.