Dymunwn Nadolig diogel a llawen i chi

Sut byddwn ni’n eich cefnogi chi er mwyn i chi fwynhau cyfnod y Nadolig.

Rydyn ni eisiau i bawb fwynhau cyfnod y Nadolig, a chael amser hapus a diogel.   Byddwn yn rhannu calendr adfent atal trosedd gyda chi o'r 1af i'r 25ain o Ragfyr gydag awgrymiadau ar gyfer atal trosedd.

Yn y calendr adfent hwn byddwn yn rhannu cyngor gan amrywiaeth eang o dimau yn Heddlu Gwent, gan gynnwys ein timau plismona cymdogaeth, y tîm atal trosedd, yr uned plismona ffyrdd a gweithrediadau arbenigol, arbenigwyr ar seiberdrosedd a llawer mwy.

I weld beth sydd y tu ôl i bob drws, gwnewch yn siŵr eich bod yn ein dilyn ni ar Facebook, Twitter ac Instagram.

Mae cyfnod y Nadolig yn un o adegau prysuraf y flwyddyn i blismona ledled y DU, bydd mwy o bobl yn ffonio ystafell gyswllt a rheoli'r heddlu a gall hynny arwain at amseroedd aros hwy.

Helpwch ni i fod yna i'r bobl sydd angen cymorth go iawn trwy ystyried yn ofalus pwy y dylech chi siarad â nhw.

I riportio digwyddiadau nad ydyn nhw’n rhai brys, ffoniwch 101 neu anfonwch neges uniongyrchol atom ni ar gyfryngau cymdeithasol.

I riportio digwyddiad lle mae bygythiad i fywyd rhywun, ffoniwch 999 bob tro.

Gallwch riportio trosedd neu ymddygiad amheus trwy gysylltu â Crimestoppers hefyd ar 0800 555 111 neu ar y wefan https://crimestoppers-uk.org/.

I riportio unrhyw broblemau fel tipio anghyfreithlon, cŵn yn baeddu neu sŵn sy'n peri niwsans, cysylltwch â'ch cyngor lleol. Dewch o hyd i'ch cyngor lleol yma.

Bydd Canolfan Derbynfa Alcohol yn gweithredu yng nghanol dinas Casnewydd ar nos Wener a nos Sadwrn tan oriau mân y bore dros gyfnod yr Ŵyl. Bydd y ganolfan hon yn edrych ar ôl pobl sydd yn sâl neu wedi anafu a bydd yn gallu trin a rhyddhau pobl ag anafiadau llai difrifol yn y fan a'r lle. Bydd hyn yn lleihau ychydig o'r pwysau ar y GIG.