Gwahoddiad i drigolion Alway i ddigwyddiad Strydoedd Saffach

Mae trigolion Alway yn cael eu gwahodd i ddigwyddiad cyhoeddus i glywed mwy am y cynllun a fydd yn gweld buddsoddiad o bron i £750,000 mewn mesurau atal trosedd yng Ngwent.

Yn ôl ym mis Gorffennaf, cyhoeddodd yr heddlu y bu’n llwyddiannus wrth sicrhau cyllid ychwanegol o gynllun Strydoedd Saffach y Swyddfa Gartref – rhaglen sy’n rhoi cyfle i heddluoedd ledled Cymru a Lloegr i wneud cais am gyllid i gynorthwyo â gwaith atal troseddau.

Er bod Heddlu Gwent yn gweithio drwy’r flwyddyn gron i ddiogelu cymunedau rhag effaith troseddau a thargedu’r sawl sy’n troseddu, mae’r cyllid hwn yn rhoi mwy o arian iddyn nhw allu cyflawni nifer o ymyriadau.

Bydd y £746,702 a gafodd Heddlu Gwent yn ystod y cylch diwethaf yn cael ei ddefnyddio i helpu i atal ymddygiad gwrthgymdeithasol a throseddau cymdogaeth fel bwrgleriaeth, lladrata a dwyn ar draws chwe ardal yng Ngwent – Alway yng Nghasnewydd, y Coed Duon, Brynmawr, Cil-y-coed, Cwmbrân a Thredegar.

Fel rhan o hyn, bydd y tîm yn cynnal nifer o gymorthfeydd lle gall trigolion o’r ardaloedd hyn gwrdd â swyddogion dysgu mwy am sut mae’r heddlu’n taclo troseddau a chael pecynnau atal troseddau am ddim.

Bydd y cyntaf o’r digwyddiadau hyn yn cael eu cynnal yng Ngorsaf Heddlu Alway rhwng 10am a 2pm ddydd Mawrth 18 a dydd Mercher 19 Hydref.

Gall y rhai hynny sy’n byw yn Alway ymweld â’r orsaf i siarad â swyddogion am y prosiect Strydoedd Saffach, atal troseddau, a chyhyd â’u bod yn darparu prawf o’u cyfeiriad, pecyn atal troseddau am ddim.

Dywedodd y Prif Arolygydd Hannah Lawton, sy’n arwain y prosiect yng Ngwent:

“Rydym yn falch o gyhoeddi’r gymhorthfa Strydoedd Saffach nesaf yng Ngwent ac yn edrych ymlaen at gwrdd â thrigolion yn Alway i egluro beth fyddwn yn ei wneud dros y misoedd nesaf yn rhan o’r cynllun.

“Er bod ein swyddogion yn gweithio bob dydd i ddiogelu’n cymunedau rhag troseddau fel bwrgleriaeth, mae’r fenter Strydoedd Saffach yn rhoi mwy o arian i ni na fyddem ni’n ei gael fel arfer a gallwn ddefnyddio hwn i brynu offer atal troseddau ar sail tystiolaeth ac ariannu ymyriadau fel hyn.

“Yr wythnos nesaf, gall y rhai sy’n byw yn Alway ddysgu mwy am y prosiect, siarad â swyddogion am unrhyw bryderon sydd ganddynt yn eu cymunedau a chael pecyn atal troseddau a chyngor am ddim.

“Gall y pecynnau gynnwys nifer o eitemau gan gynnwys pecynnau fforensig i farcio eiddo, arwyddion ac offer atal a all helpu i ddiogelu’ch cartrefi, ceir ac eitemau gwerthfawr – eitemau fel larymau ffenestri neu sied, pecynnau diogelwch rhif car, pocedi atal signal ceir diallwedd a mwy.

“Bydd swyddogion o’r tîm wrth law i siarad â thrigolion am y pecynnau, darparu cyngor ar gynyddu diogelwch a sut i atal lladron, yn ogystal â sut arall y  bydd y cyllid ychwanegol hwn yn cael ei ddefnyddio yn Alway a chymunedau eraill yn ardal Heddlu Gwent.”

Os ydych yn dod o’r ardal ond yn methu â dod i’r digwydd ddydd Sadwrn, anfonwch e-bost i [email protected] i gael gwybod sut y gallwch gael pecyn.

I gael rhagor o wybodaeth am waith Strydoedd Saffach yng Ngwent, ewch i https://www.gwent.police.uk/cy-GB/heddluoedd/heddlu-gwent/ardaloedd/ymgyrchoedd/ymgyrchoedd/2021/safer-streets/