Cyffuriau gwerth tua £715,000 wedi’u hatafaelu
Cynnwys y prif erthygl
Mae swyddogion ledled de Cymru wedi arestio 46 o bobl a diogelu 24 o bobl agored i niwed yn ystod wythnos o weithredu pwrpasol i darfu ar linellau cyffuriau.
Llinellau cyffuriau yw’r enw a roddir ar ddelio cyffuriau lle mae grwpiau troseddau trefnedig yn symud a chyflenwi cyffuriau, fel arfer o ddinasoedd i drefi llai ac ardaloedd gwledig.
Mae’r gweithredu wedi cyd-daro ag “wythnos dwysau” cenedlaethol dan arweiniad yr Asiantaeth Troseddu Cenedlaethol. Cynhaliwyd yr wythnos ddiweddaraf o weithredu rhwng dydd Llun 3 Hydref a dydd Gwener 10 Hydref.
Mae uchafbwyntiau’r hyn a gyflawnwyd gan y tri heddlu (De Cymru, Gwent a Dyfed Powys), yn cynnwys y canlynol:
- Arestio 46 o bobl
- Datgymalu pum llinell
- Gweithredu naw gwarant chwilio
- Atafaelu £34,710
- Atafaelu 7,020g o gocên [gwerth £700,000 ar y stryd]
- Atafaelu amrywiaeth o arfau gan gynnwys machetes, cyllyll, batiau pêl fas, dyrnau haearn ac arfau tanio ffug
- Adnabod a diogelu 24 o blant ac oedolion agored i niwed
- Defnyddio cŵn cyffuriau goddefol mewn gorsafoedd trenau yng Nghaerdydd, Casnewydd ac Abertawe, mewn partneriaeth â Heddlu Trafnidiaeth Prydeinig
- Atafaelu 52 ffôn symudol
Bu swyddogion hefyd yn ymgysylltu â phlant, rhieni a gweithwyr proffesiynol i dynnu sylw at beryglon ymwneud â gweithgareddau Llinellau Cyffuriau, a chyflwynwyd sesiynau ymwybyddiaeth Llinellau Cyffuriau i dros 1,000 o bartneriaid amlasiantaeth a 11,000 o blant.
Meddai Ditectif Arolygydd Richard Weber, cyd-gysylltydd yr wythnos o weithredu yn ne Cymru:
“Er ein bod ni’n gweithio gydol y flwyddyn i waredu ein strydoedd o gyffuriau, mae’r wythnos hon wedi arwain at rai canlyniadau sylweddol. Trwy darfu ar linellau cyflenwi a chymryd y rhai sy’n gyfrifol allan o’r cylchrediad cyflenwi, gallwn wneud cymunedau de Cymru’n fwy diogel.
“Ni allwn wneud hyn heb y gefnogaeth a’r wybodaeth rydym yn ei chael gan drigolion felly gofynnaf yn daer ar unrhyw un â gwybodaeth am ddelio cyffuriau yn ei gymuned i’n ffonio ni ar 101. Mae pob darn o wybodaeth yn bwysig i ni.”