Y llu yn cefnogi wythnos o weithredu i helpu i amddiffyn busnesau lleol

Mae Heddlu Gwent yn cefnogi ymgyrch Canolfan Troseddau Busnes Cenedlaethol (NBCC) i amddiffyn busnesau rhag troseddau.

Fel rhan o ymgyrch genedlaethol i gefnogi ac amddiffyn busnesau ledled y wlad, mae tîm Dangos y Drws i Drosedd Heddlu Gwent yn cynnal nifer o ddigwyddiadau ymgysylltu ledled ardal yr heddlu yr wythnos hon — gyda'r nod o 'ymgysylltu â busnesau lleol, manwerthwyr a'r gymuned, i godi ymwybyddiaeth o droseddau busnes yn yr ardal.'

Mae’r tîm, sy’n targedu troseddau meddiangar fel bwrgleriaeth, dwyn a lladrad, yn cefnogi busnesau drwy gydol y flwyddyn, drwy rannu cyngor ar atal troseddau a diogelwch, darparu pecynnau marcio eiddo SmartWater i’r rhai y mae’r troseddau hyn yn effeithio arnynt, a thrwy weithio gyda manwerthwyr ail law i atal nwyddau sydd wedi’u dwyn rhag cael eu gwerthu.

Yn ystod Wythnos Troseddau Busnes NBCC (17 - 21 Hydref), bydd wythnos weithredu Gwent yn gweld swyddogion yn cynnal patrolau wedi’u targedu ledled yr ardaloedd yr effeithiwyd arnynt yn flaenorol gan droseddau meddiangar, ac yn gweithio gyda busnesau a phartneriaid lleol i godi ymwybyddiaeth o’r mesurau y gellir eu cymryd i atal troseddau a lladron.

Dywedodd y Rhingyll Kate Llewellyn: "Drwy gydol yr wythnos o weithredu, byddwn yn cynnal amrywiol weithgareddau atal troseddau ledled Gwent er mwyn siarad â busnesau am y pethau y gallant eu gwneud i wella diogelwch, amddiffyn eu hasedau ac atal lladron manteisgar.

"Byddwn yn siarad â manwerthwyr ar y stryd fawr a busnesau ar ystadau diwydiannol am amrywiaeth o gamau y gellir eu cymryd i wella diogelwch ac atal troseddau fel byrgleriaeth – troseddau a all gael effaith ddinistriol ar fusnesau a'r gymuned ehangach.

"Fel heddlu, rydym wedi ymrwymo i fynd i’r afael â’r rhai sy’n elwa ar droseddu, a byddwn yn parhau i weithio gyda’n cymunedau, busnesau ac asiantaethau partner i adnabod troseddwyr a dod â nhw o flaen eu gwell."

Bydd y tîm wrth law i siarad â phobl fusnes ar y dyddiadau canlynol yr wythnos hon:

• Dydd Mawrth 18 Hydref – canol tref y Coed-duon
• Dydd Mercher 19 Hydref – canol dinas Casnewydd
• Dydd Iau 20 Hydref – canol tref Bargoed
• Dydd Gwener 21 Hydref – diwrnod ymgysylltu/patrolau amlwg yng Nghwmbrân

Bydd cyfrif Dangos y Drws i Drosedd (@GP_WDBC) yr heddlu yn rhannu’r wybodaeth ddiweddaraf am y gweithgarwch sy'n digwydd drwy gydol yr wythnos.

I gael rhagor o wybodaeth am sut mae Heddlu Gwent yn mynd i’r afael â throseddau meddiangar yng Ngwent, ewch i: https://www.gwent.police.uk/cy-GB/heddluoedd/heddlu-gwent/ardaloedd/ymgyrchoedd/ymgyrchoedd/2021/we-dont-buy-crime/.