Blog Dangos y Drws i Drosedd: Ein gwaith hyd yma yn 2023

Croeso i'n trydydd blog am droseddau meddiangar.

Mae ein tîm Dangos y Drws i Drosedd (DyDiD) yn helpu i atal trosedd a chadw cymunedau ledled Gwent yn ddiogel.

Trwy weithio mewn partneriaeth gyda chymunedau a busnesau, mae'r tîm yn gallu dal ac euogfarnu troseddwyr sy'n cyflawni:

• byrgleriaeth
• lladrad
• dwyn
• troseddau cerbyd.

Yn ystod mis Ionawr cafwyd gostyngiad mewn troseddau meddiangar o gymharu â mis Rhagfyr - gan gynnwys dwyn, dwyn beiciau, a dwyn cerbydau.  Cafwyd gostyngiad hefyd mewn achosion o fyrgleriaethau masnachol, byrgleriaethau preswyl, a throseddau cerbyd o gymharu â'r cyfartaledd misol dwy flynedd.

Mae tîm DyDiD wedi bod yn gweithio'n galed gyda thrigolion ledled Gwent trwy gydol mis Ionawr, ac maen nhw wedi:

• adolygu 1,383 trosedd meddiangar
• adfer gwerth £22,000 o nwyddau wedi'u dwyn
• marcio 154 o feiciau a beiciau modur gyda SmartWater
• hyfforddi 98 o bobl i adnabod arwyddion cam-fanteisio
• dosbarthu 139 pecyn atal trosedd i drigolion a busnesau ledled Gwent.

Hyd yn hyn, mae'r tîm wedi adfer gwerth £176,345 o nwyddau diolch i farcio fforensig.

Meddai Arolygydd Carl Morgan:

“Mae'r tîm yn gweithio ochr yn ochr â phartneriaid a chymunedau, yn ogystal â chydweithwyr ledled yr heddlu, i fynd i'r afael â throseddau meddiangar difrifol a threfnedig.

“ Trwy ddefnyddio asedau cudd-wybodaeth, yn ogystal â marcio SmartWater, mae swyddogion yn gallu targedu'r troseddwyr mwyaf cyson a dychwelyd eiddo i berchnogion.

"Cafwyd canlyniadau gwych gan y tîm yn ystod mis Ionawr, ac rydyn ni'n disgwyl mwy o ganlyniadau gwych wrth symud ymlaen."

Edrychwch ar rywfaint o'r gwaith arall mae ein tîm wedi'i gyflawni...

Gweithiodd y tîm ochr yn ochr â'n timau cymdogaeth i gynnal nifer o ddigwyddiadau marcio beiciau trwy gydol mis Ionawr.

Cynhaliwyd y digwyddiadau hyn mewn ardaloedd ledled Gwent er mwyn i bobl fynd â'u beiciau i gael eu marcio gyda hylif fforensig. Cafodd 85 o feiciau eu marcio yn defnyddio BikeRegisterUK.

Yn dilyn byrgleriaeth, aeth PC Anthony Moore, ein swyddog troseddau busnes, i storfa Ambiwlans Awyr Cymru yng Nghoed-duon.

Rhoddodd arwyddion atal trosedd a thechnoleg SmartWater iddyn nhw i'w helpu nhw i gadw eu busnes yn ddiogel.

Aeth ein hyfforddwyr, Natalie a Karon, i westy Celtic Manor i hyfforddi partneriaid i adnabod arwyddion oedolion a phlant sy'n agored i niwed a cham-fanteisio. Aeth Huw, ein cyd-gysylltydd DyDiD,  i Glwb Garddio Bargod i roi cyflwyniad ar yr adran DyDiD a chyngor atal trosedd wedi'i anelu'n bwrpasol at arddwyr a phobl sy'n defnyddio siediau a thai gwydr.

Yn ystod mis Ionawr, rhoddodd ein swyddogion troseddau busnes gymorth i'r ymgyrch Strydoedd Saffach, gan gofrestru 40 o fusnesau ar y cynllun.

Troseddau metel

Wrth i werth metel sgrap barhau i godi, mae swyddogion wedi gweld mwy o ladron yn targedu cerbydau gyda throswr catalytig.

Hwylusodd y tîm DYDID hyfforddiant datblygu ar gyfer 18 o swyddogion ym mis Ionawr ac maen nhw'n gobeithio gwneud mwy yn ystod y flwyddyn.

Ar ôl i'r hyfforddiant hwn gael ei gynnal:

• Anfonwyd 64 rhybudd at werthwyr nwyddau ail law a delwyr sgrap
• Aeth ein swyddogion troseddau busnes i 16 safle metel sgrap yng Ngwent o dan y Ddeddf Delwyr Metel Sgrap.

Ein partneriaid, digwyddiadau, a'r gymuned

Mae ein tîm yn parhau i weithio gyda’r gymuned a’n partneriaid i ddiogelu’r cyhoedd a busnesau.

Maen nhw’n gweithio i nodi tueddiadau troseddu, sicrhau bod camau ataliol ar waith, cefnogi dioddefwyr trosedd ac adnabod y rhai sy’n eu cyflawni yn ein cymunedau.

I gael mwy o wybodaeth am y digwyddiadau sydd ar y gweill ac i wybod lle maen nhw yn y gymuned, dilynwch y tîm ar Twitter neu ewch i'w tudalen ar ein gwefan.

Os hoffech chi ddysgu mwy am sut gall y tîm eich helpu chi, anfonwch e-bost at [email protected].

Os gwelwch chi drosedd yn cael ei chyflawni, ffoniwch 101, defnyddiwch ein system riportio ar-lein, neu anfonwch neges atom ni ar Facebook a Twitter. Gallwch riportio wrth Crimestoppers yn gwbl anhysbys hefyd, ar eu gwefan neu drwy ffonio 0800 555 111.

Ffoniwch 999 bob tro mewn argyfwng.