Swyddogion yr heddlu yn ymafael mewn canabis gwerth bron i £9m

Ymgyrch digynsail gan yr heddlu yn erbyn troseddau cyfundrefnol yn arwain at 52 o arestiadau ac ymafael mewn gwerth £8.7 miliwn o ganabis ledled de Cymru.

Drwy gydol mis Mehefin, cymerodd heddluoedd yng Nghymru a Lloegr ran mewn cyfnod dwysáu wedi’i gynllunio i darfu ar grwpiau troseddau cyfundrefnol (OCG) drwy ddileu ffynhonnell allweddol o'u refeniw a dal llawer o'r rhai sy’n rhan ohonynt ar yr un pryd, gan ddiogelu'r rhai hynny sy'n cael eu hecsbloetio, a chynyddu cudd-wybodaeth.

Cafodd rhwydweithiau troseddol sy'n ymwneud â gwerthu cyffuriau, troseddau mewnfudo a gwyngalchu arian eu targedu gan yr heddlu ac asiantaethau partner fel rhan o Ymgyrch Mille, pan wnaeth heddluoedd ganolbwyntio adnoddau ar fynd i’r afael â thyfu canabis ar raddfa fawr – ffynhonnell allweddol o incwm anghyfreithlon ar gyfer gangiau cyfundrefnol.

Tarian, yr uned troseddau cyfundrefnol rhanbarthol (ROCU) fu’n cydlynu’r gweithgarwch yn ne Cymru.

Yn ystod y mis, ar draws y tri llu heddlu sy'n gwasanaethu de Cymru, sef Heddlu De Cymru, Heddlu Gwent a Heddlu Dyfed Powys, cyflawnwyd y canlynol:

• 86 gwarant wedi’u gweithredu;
• 64 wedi’u harestio am droseddau gan gynnwys cynhyrchu canabis, cynhyrchu cyffur dosbarth B, a thyfu canabis;
• 43 o bobl wedi’u cyhuddo;
• 16,958 o blanhigion canabis wedi’u hymafael, gydag amcangyfrif gwerth stryd o fwy na £8.7miliwn;
• Cafodd ffonau symudol, arian parod a dogfennau ffug eu hymafael hefyd;

Mae'r cysylltiadau rhwng troseddau difrifol a'r rhai sy'n ymwneud â thyfu canabis yn glir, gyda'r fasnach gyffuriau yn hybu trais gan gangiau wrth i grwpiau gystadlu am diriogaeth a cheisio mynd ar drywydd eu cystadleuwyr.

Dywedodd Wendy Gunney, prif gwnstabl cynorthwyol Tarian ROCU:

"Mae'r uned troseddau cyfundrefnol rhanbarthol ar gyfer de Cymru wedi gweithio'n agos gyda'r rhwydwaith plismona cenedlaethol i dargedu a tharfu ar gynhyrchu canabis cyfundrefnol yn ein rhanbarth."

"Mae'r math hwn o droseddoldeb yn cael effaith niweidiol iawn ar ein cymunedau, ac mae'n hanfodol ein bod yn parhau i gydweithio â phartneriaid gorfodi'r gyfraith ac asiantaethau allanol i darfu ar droseddwyr."

"Hoffwn ddiolch i bawb a oedd yn rhan o ymdrechion ein rhanbarth ar Ymgyrch Mille; mae eu penderfyniad a'u cadernid wedi arwain at ein canlyniadau llwyddiannus. Rydym hefyd wedi casglu llawer iawn o ddata a fydd yn helpu i ganolbwyntio ein hymdrechion yn y dyfodol i ymdrin â Grwpiau Troseddau Cyfundrefnol a diogelu'r rhai sydd â'r risg fwyaf o niwed."

Mae ffatrïoedd canabis hefyd yn fygythiad lleol gwirioneddol. Mae maint 'ffatrïoedd’ canabis troseddol yn golygu bod difrod yn aml yn cael ei achosi i'r eiddo ei hunain; gall yr adeiladau fod yn beryglus o ganlyniad i risgiau tân, defnyddio trydan yn anghyfreithlon, mygdarth a difrod dŵr.

Dyma rai arwyddion allweddol sy’n dangos y gallai eiddo fod yn cael ei ddefnyddio fel ffatri canabis:

• Pobl yn ymweld yn aml a’r eiddo yn ystod oriau anghymdeithasol drwy gydol y dydd a'r nos.
• Ffenestri wedi’u duo, neu anwedd ar y ffenestri, hyd yn oed pan nad yw'n oer y tu allan.
• Goleuadau llachar mewn ystafelloedd trwy gydol y nos.
• Mesuryddion trydan yn cael eu hymyrryd â nhw/ eu newid a chebl newydd, weithiau'n arwain at oleuadau stryd. Gallai biliau trydan uchel hefyd fod yn arwydd.
• Arogl cryf, unigryw, melys, a sŵn gan ffaniau.
• Llawer o waith yn digwydd neu gyfarpar yn cael ei ddanfon i gyfeiriad, fel gwresogyddion a goleuadau, yn enwedig i’r rhai sy'n gysylltiedig â thyfu planhigion dan do heb bridd.
• Gormodedd o botiau planhigion, cemegau, gwrtaith, a chompost.

Gall unrhyw un sydd â gwybodaeth am ffatri ganabis bosibl neu werthu cyffuriau gysylltu â'u heddlu lleol ar-lein neu drwy 101.

Gall pobl hefyd gysylltu â Crimestoppers, yn ddienw, ar 0800 555 111 neu crimestoppers-uk.org.