TEYRNGED: ‘Byddwn yn ei golli bob dydd’

Wrth i ni barhau i apelio am dystion, mae teulu gyrrwr beic modur o Gaerffili, a fu farw mewn gwrthdrawiad ger Bedwas, wedi talu teyrnged iddo.

Mae teulu gyrrwr beic modur a fu farw ar yr A468 ger Bedwas, wedi talu teyrnged iddo, gan ddweud ei fod ‘yn annwyl gan bawb oedd yn ei adnabod’.

Galwyd swyddogion i leoliad gwrthdrawiad traffig ffyrdd am 5.50pm ddydd Gwener 7 Gorffennaf rhwng dau feic modur a char.

Aeth personél o Ambiwlans Awyr Cymru a Gwasanaeth Ambiwlans Cymru i’r lleoliad hefyd a chadarnhaodd parafeddygon fod dyn 60 oed o Gaerffili wedi marw yn y fan a’r lle.

Ei enw oedd Darrel King ac mae ei deulu’n parhau i gael cymorth gan swyddogion arbenigol.

Darrel King

Mae ei deulu wedi talu’r deyrnged ganlynol iddo:

“Roedd Darrel yn fab, tad, ewythr a thad-cu bendigedig a oedd yn caru bywyd ac yn annwyl gan bawb oedd yn ei adnabod.

“Fel teulu mae ei farwolaeth sydyn a thrasig wedi torri ein calonnau a byddwn yn ei golli bob dydd.

“Hoffem gymryd y cyfle yma i ddiolch i’r bobl a stopiodd i gynnig cymorth ac i’r holl wasanaethau brys am eu hymdrechion ac am bopeth a wnaethant iddo.”

Cafodd dyn 70 oed o ardal Caerffili ei drosglwyddo o Ysbyty Athrofaol Cymru i ysbyty arall am driniaeth ac mae mewn cyflwr sefydlog.

Rydyn ni’n parhau i apelio am dystion a hoffai swyddogion siarad ag unrhyw fodurwyr a oedd yn teithio ar yr A468 - rhwng cylchfan Cedar Tree a Bedwas - rhwng 5.30pm a 6.30pm ddydd Gwener 7 Gorffennaf.

Gofynnir i unrhyw un â lluniau CCTV neu gamera car gysylltu â ni hefyd drwy ffonio 101 neu drwy anfon neges uniongyrchol atom ni ar gyfryngau cymdeithasol, gan grybwyll rhif cofnod 2300225926.