Ymateb i Adroddiad HMICFRS ar effeithiolrwydd trefniadau fetio a gwrthlygredd yn Heddlu Gwent
Cynnwys y prif erthygl
Heddiw, cadarnhaodd HMICFRS bod ei arolwg wedi canfod bod effeithiolrwydd trefniadau fetio a gwrthlygredd yn Heddlu Gwent yn ddigonol.
Heddiw (16/06/23), cadarnhaodd HMICFRS bod ei arolwg wedi canfod bod effeithiolrwydd trefniadau fetio a gwrthlygredd yn Heddlu Gwent yn ddigonol. Cynhaliwyd yr arolwg ym mis Rhagfyr 2022.
Canfu’r arolwg:
- Bod pob swyddog sy’n trosglwyddo i Heddlu Gwent yn destun ail fetio llawn cyn penodiad.
- Bod fetio ar gyfer personél nad ydynt yn heddlu yn cael ei reoli’n effeithiol.
- Bod gwiriadau fetio’n cael eu cwblhau yn dilyn cytundebau/gwrandawiadau camymddygiad.
- Ein bod yn defnyddio mesurau lliniaru risg yn rheolaidd i ategu penderfyniadau fetio a bod achosion perthnasol yn cael eu cyfeirio at yr Uned Wrthlygredd er mwyn rhoi strategaethau rheoli risg ar waith.
- Bod canlyniadau fetio i’r rhai hynny â nodweddion gwarchodedig yn cael eu cadw ac yn destun craffu o ran bod yn gymesur.
- Ein bod yn gwneud “defnydd ardderchog” o systemau monitro TG, a bod ein gweithgareddau’n cael eu hategu gan bolisïau “cynhwysfawr”, gan gynnwys polisi cyfryngau cymdeithasol cadarn, sy’n cynnwys canllawiau ar sut i ddefnyddio cymwysiadau negeseuon gwib yn briodol.
- Bod gweithrediadau canfod llygredd rhagweithiol yr Uned Wrthlygredd yn haeddu clod ac y dylid “llongyfarch” ei phrosesau asesu risg cynhwysfawr.
Rydym wedi cymryd camau eisoes i roi sylw i unrhyw feysydd yr oedd angen eu gwella.
Meddai Pennaeth Safonau Proffesiynol, Uwch-arolygydd Sam Payne: “Mae’r adroddiad arolwg hwn yn hynod o ddefnyddiol i roi tawelwch meddwl i’r cyhoedd bod gennym ni ystod lawn o fesurau i fetio swyddogion newydd a rhai sy’n bodoli eisoes yn drwyadl ac yn amserol. Mae hefyd yn dangos tystiolaeth o’r gwaith rydym yn ei wneud i gynnal safonau ymddygiad proffesiynol.
“Mae gennym ni ddisgwyliadau clir o ran sut rydym yn disgwyl i’n swyddogion a staff ymddwyn a’r safonau uchel mae’r cyhoedd yn eu disgwyl gennym ni. Mae canfyddiadau’r arolwg yn pwysleisio bod gennym ni brosesau cadarn ar waith i ganfod unrhyw feysydd o bryder. Pan fydd cydweithwyr yn methu cynnal y safonau hynny byddwn yn cymryd camau gweithredu’n ddi-oed.”