‘Annwyl gan bawb a bydd colled fawr ar ei ôl’

Mae teulu Darran Medd a fu farw mewn gwrthdrawiad ger Tredomen wedi ei ddisgrifio fel rhywun ‘annwyl gan bawb’ a rhywun y ‘bydd colled fawr ar ei ôl’.

Mae teulu dyn o Ferthyr Tudful, a fu farw mewn gwrthdrawiad ger Tredomen, wedi cyhoeddi teyrnged iddo, gan ei ddisgrifio fel rhywun ‘annwyl gan bawb’ a rhywun y ‘bydd colled fawr ar ei ôl’.

Cawsom adroddiad am wrthdrawiad traffig ffyrdd ar yr A472, tua 2.20pm dydd Mawrth 6 Mehefin. 

Aeth swyddogion i’r safle, ynghyd â phersonél o Wasanaeth Tân ac Achub De Cymru, Ambiwlans Awyr Cymru a Gwasanaeth Ambiwlans Cymru.

Un fan oedd yn y gwrthdrawiad - Ford Transit gwyn – a chyhoeddodd parafeddygon bod y gyrrwr wedi marw yn y fan a’r lle.

Enw’r gyrrwr oedd Darran Medd, 56 o Ferthyr Tudful; mae ei deulu agosaf yn derbyn cymorth gan swyddogion arbenigol.

Mae ei deulu wedi cyhoeddi’r deyrnged ganlynol iddo:

“Cafodd ein tad, tad-cu, mab, brawd a ffrind annwyl, Darran, ei gymryd oddi wrthym ni’n drasig ac yn llawer rhy fuan.

“Fel teulu rydym yn hynod o ddiolchgar am yr holl garedigrwydd a geiriau cefnogol rydym wedi eu derbyn.

“Roedd Darran yn annwyl gan bawb a bydd colled fawr ar ei ôl.

“Hoffem ddiolch i’r gwasanaethau brys ac aelodau’r cyhoedd am eu hymdrechion ar y diwrnod hwnnw.”

Mae swyddogion sy’n ymchwilio eisiau siarad ag unrhyw un a oedd yn teithio ar yr A472, ger Tredomen rhwng 2.10pm a 2.20pm.

Gofynnir i unrhyw fodurwyr a oedd yn teithio ar yr A472, ger Tredomen rhwng 2.10pm a 2.20pm dydd Mawrth 6 Mehefin, neu unrhyw un â lluniau camera car neu CCTV, gysylltu â ni.

Gallwch ffonio 101, gan grybwyll rhif cofnod 2300185054, neu anfon neges uniongyrchol atom ni ar y cyfryngau cymdeithasol.