Datganiad Diweddaraf: Gwrthdrawiad Traffig Ffyrdd Marwol Llaneirwg, Caerdydd: Datganiad ar y cyd gan Heddlu De Cymru a Heddlu Gwent

Mae Heddlu De Cymru yn parhau i ymchwilio i wrthdrawiad traffig ffyrdd marwol ar yr A48 yn ardal Llaneirwg, Caerdydd.

Daeth y gwasanaethau brys o hyd i gerbyd Volkswagen Tiguan am 12.15am ddydd Llun 6^ed Mawrth ar ôl i hofrennydd yr heddlu, swyddogion heddlu a swyddogion tân gael eu galw i’r lleoliad.

Mae teuluoedd Rafel Jeanne, Darcy Ross ac Eve Smith, a fu farw yn y gwrthdrawiad, yn dal i gael cymorth gan swyddogion cyswllt â theuluoedd arbenigol.

Mae dau o bobl eraill yn dal mewn cyflwr difrifol yn Ysbyty Athrofaol Cymru.

Yn dilyn ymchwiliadau dechreuol yr heddlu i’r gwrthdrawiad, gallwn gadarnhau’r canlynol:

• Y tro diwethaf i’r pump o bobl gael eu gweld oedd 2am ddydd Sadwrn 4^ydd Mawrth ym Mhentwyn.
• Digwyddodd y gwrthdrawiad yn ystod oriau mân dydd Sadwrn 4^ydd Mawrth. Bydd yr ymchwiliad, gan gynnwys ymholiadau CCTV ac ANPR, yn cadarnhau’r union amser.
• Derbyniodd Heddlu Gwent yr adroddiad cyntaf am unigolyn ar goll am 7.34pm ddydd Sadwrn 4^ydd Mawrth.
• Derbyniodd Heddlu Gwent adroddiadau pellach am unigolion ar goll am 7.43pm a 9.32pm ddydd Sadwrn 4^ydd Mawrth.
• Derbyniodd Heddlu De Cymru adroddiad arall am unigolyn ar goll am 5.37pm ddydd Sul 5^ed Mawrth.
• Am 11.50pm ddydd Sul 5^ed Mawrth gofynnwyd i hofrennydd yr heddlu chwilio ardal o Gaerdydd a arweiniodd at ddarganfod cerbyd mewn coed oddi ar yr A48.
• Daeth swyddogion Heddlu Gwent, a oedd yn gwneud ymholiadau yn yr ardal gyda’r nos ddydd Sul, o hyd i gerbyd Volkswagen Tiguan am 12.15am ddydd Llun 6^ed Mawrth.
• Ar hyn o bryd, rydym yn credu mai un cerbyd yn unig oedd yn y gwrthdrawiad.

Meddai Prif Gwnstabl Cynorthwyol Mark Hoborough o Heddlu Gwent: 

“Mae hon yn sefyllfa eithriadol o drist ac estynnwn ein cydymdeimlad i deuluoedd a ffrindiau pob un o’r bobl ifanc. Byddwn yn parhau i gefnogi’r ymchwiliad hwn a gofynnwn i aelodau’r cyhoedd beidio â gwagddyfalu yn ystod y cyfnod hwn.”

Meddai Prif Gwnstabl Cynorthwyol Jason Davies o Heddlu De Cymru:

“Cydymdeimlwn â’r teuluoedd a phawb sydd wedi cael eu heffeithio gan y digwyddiad trasig hwn. Mae swyddogion arbenigol yn cynnal ymchwiliad manwl i geisio darganfod beth sydd wedi digwydd. Mae swyddogion cyswllt â theuluoedd arbenigol yn rhoi cymorth i’r teuluoedd ar yr adeg anodd ofnadwy yma iddyn nhw.”

Mae Heddlu Gwent a Heddlu De Cymru wedi cyfeirio’r mater at Swyddfa Annibynnol Ymddygiad yr Heddlu, fel sy’n arferol yn yr amgylchiadau hyn.