Pedwar wedi’u harestio yn dilyn gwarant yr wythnos ddiwethaf

Ddydd Iau 2 Mawrth, gweithredodd swyddogion warant mewn tri chyfeiriad, dau yng Nghasnewydd ac un yng Nghaerdydd.

Arestiwyd dwy fenyw, un 20 oed o Gasnewydd ac un 20 oed o Gaerloyw, a dau ddyn, un 46 oed o Gasnewydd ac un 53 oed o Gaerdydd, ar amheuaeth o droseddau cam-fanteisio’n rhywiol ar blant.

Meddai Ditectif Ringyll Michael Patterson, swyddog yn yr achos:

"Gweithredwyd y warant hon yn rhan o ymchwiliad parhaus i gam-fanteisio rhywiol ar blant yng Ngwent.

"Mae troseddwyr yn cam-fanteisio ar bobl ifanc, agored i niwed, trwy orfodi, dylanwadu a meithrin perthnasau amhriodol â nhw, er mwyn eu cael nhw i gyflawni gweithgareddau rhywiol neu droseddol ar eu rhan.

" Mae achosion sy’n ymwneud â cham-fanteisio ar blant yn eithriadol o ddifrifol ac maen nhw’n cael effaith emosiynol enfawr, nid yn unig ar y dioddefwyr, ond ar deuluoedd cyfan, a’r cymunedau lle mae’r cam-fanteisio yn digwydd.

"Rydyn ni’n deall bod pobl eisiau amddiffyn plant, a dylai unrhyw aelod o’r cyhoedd gyda gwybodaeth am gam-fanteisio ar blentyn gysylltu â ni er mwyn i ni ymchwilio a dwyn pobl o flaen eu gwell.”

💻 Os oes gan unrhyw un bryderon, ffoniwch 101 i riportio’r mater, neu anfonwch e-bost at CEOP.

🆘 Os ydych chi’n credu bod plentyn mewn perygl o niwed ar unwaith, ffoniwch 999 bob tro.