Diweddariad Prosiect EDWARD

Yr wythnos diwethaf, cymerodd ein tîm plismona ffyrdd ac ymgyrchoedd arbenigol (RPSO) ran mewn ymgyrch diogelwch ffyrdd genedlaethol, gan helpu i atal marwolaeth ac anafiadau difrifol ar ein ffyrdd.

Cynhaliwyd Prosiect EDWARD, sy'n sefyll am 'every day without a road death', dros bum diwrnod a gwelwyd ein swyddogion yn cynnal mwy o batrolau, mewn ymgais i hyrwyddo gyrru diogel fel bod pob dydd yn un heb farwolaeth ar y ffordd.

Mae'r prosiect yn hyrwyddo dull 'system ddiogel' a arweinir gan dystiolaeth. Y nod hirdymor yw sicrhau system traffig ffyrdd sy'n rhydd rhag marwolaeth ac anafiadau difrifol.

Trwy gydol yr wythnos, cynhaliodd swyddogion fwy o batrolau a stopio'r rhai a oedd yn cyflawni unrhyw droseddau a lle bo’n bosibl, darparu addysg ar ddiogelwch ar y ffyrdd.

Roedd y canlyniadau'n cynnwys:
• pum arestiad am yrru dan ddylanwad diod neu gyffuriau
• tri arestiad am yrru'n beryglus neu yrru heb ofal dyladwy
• naw cerbyd wedi'u meddiannu am nad oedd ganddynt yswiriant neu drwydded
• wyth trosedd llwyth anniogel
• 102 o adroddiadau trosedd traffig am oryrru neu ddefnyddio ffôn symudol
• 25 atgyfeiriad treth
• 136 prawf cyffuriau neu ddiod negyddol
• 416 rhybudd o erlyniad bwriadedig am oryrru, defnyddio ffôn symudol, a pheidio â gwisgo gwregys diogelwch
• dim gwrthdrawiadau traffig ffyrdd angheuol.

Dywedodd y Rhingyll Lewys Davies, a arweiniodd yr ymgyrch hon:

"Mae ein swyddogion yn cymryd rhan mewn sawl ymgyrch diogelwch ar y ffyrdd drwy gydol y flwyddyn, ac mae gan bob un ohonynt yr un nod: helpu i gadw ein ffyrdd yn ddiogel i bawb, a chadw'r ffyrdd yn rhydd o farwolaeth ac anafiadau difrifol.

"Hoffwn ddiolch i'r holl asiantaethau partner a helpodd yn ystod yr ymgyrch hon, gan gynnwys GoSafe, Gwasanaeth Ambiwlans Cymru, a Gwasanaeth Tân ac Achub De Cymru. Fel y gallwch weld o'r canlyniadau, cawsom ganlyniadau gwych.

"Bydd swyddogion yn parhau i batrolio ffyrdd Gwent i helpu i gadw pob defnyddiwr ffyrdd yn ddiogel, a bydd y rhai sy'n cyflawni troseddau yn cael eu herlyn."