63 o bobl wedi’u harestio yn dilyn gweithredu dwys yn erbyn llinellau cyffuriau ledled de Cymru

Datgymalwyd wyth llinell cyffuriau ac atafaelwyd cyffuriau gwerth mwy na £3.15 miliwn gan swyddogion o heddluoedd Gwent, De Cymru a Dyfed-Powys.

Mae 63 o bobl wedi cael eu harestio a chyffuriau gwerth dros £3.15 miliwn wedi cael eu hatafaelu ledled de Cymru wrth i’r heddlu weithredu i darfu ar weithgarwch llinellau cyffuriau. 

Gweithiodd Tarian, yr Uned Troseddau Cyfundrefnol Rhanbarthol (ROCU) ar gyfer de Cymru, gyda phartneriaid gorfodi’r gyfraith cenedlaethol i gydgysylltu gweithgareddau yn ystod yr wythnos o weithredu dwys yn erbyn llinellau cyffuriau. 

Gweithredodd swyddogion o heddluoedd Gwent, De Cymru a Dyfed-Powys 17 gwarant, arestiwyd 63 o bobl a datgymalwyd wyth llinell cyffuriau. 

Gwnaethant adfer £260,000 mewn arian parod a diogelu 63 o bobl agored i niwed a phlant hefyd yn ystod yr wythnos o weithredu o ddydd Llun 9 Hydref i ddydd Sul 15 Hydref. 

Meddai Ditectif Arolygydd Richard Weber, o Tarian:

“Pwrpas yr wythnosau o weithredu dwys yma yw tarfu ar gangiau troseddau cyfundrefnol, y mae eu bwriadau hunanol yn achosi niwed aruthrol i’r bobl maen nhw’n eu hecsbloetio. 

“Mae’r canlyniadau cadarnhaol rydyn ni wedi eu cyflawni yn ganlyniad ymdrech gydweithredol gan swyddogion a staff heddlu ymroddedig. Mae eu hymdrechion nhw wedi dangos y byddwn yn parhau i ymlid troseddwyr llinellau cyffuriau, wrth weithio i amddiffyn ein cymunedau.” 

Llinellau cyffuriau yw’r enw a roddir ar ddelio cyffuriau lle mae grwpiau troseddau cyfundrefnol yn symud a chyflenwi cyffuriau, fel arfer o ddinasoedd i drefi llai ac ardaloedd gwledig.  

Defnyddiodd swyddogion amrywiaeth o adnoddau, gan gynnwys technoleg adnabod rhifau cerbydau yn awtomatig (ANPR), cyrchoedd cyllyll, gwarantau chwilio, swyddogion cudd a chŵn heddlu. 

Chwaraeodd aelodau’r cyhoedd ran allweddol hefyd trwy riportio eu pryderon am ecsbloetiaeth llinellau cyffuriau posibl.   

Uchafbwyntiau eraill yn ystod yr wythnos o weithredu dwys oedd: 

• Atafaelu crac cocên gyda gwerth tybiedig o hyd at £2,000 ar y stryd.
• Gwaredu cocên gyda gwerth tybiedig o hyd at  £16,000 ar y stryd.
• Atafaelu 4,580 planhigyn canabis gyda gwerth tybiedig o hyd at £3.1 miliwn ar y stryd.
• Gwaredu amryw o arfau – gan gynnwys cyllyll, morthwylion, petrol taniwr a dau wn saethu.

Meddai Ditectif Arolygydd Weber: “Yn ogystal â gweithgarwch gorfodi, ymgysylltodd swyddogion a staff heddlu gyda phartneriaid o’r meysydd iechyd, addysg, tai, lletygarwch, trafnidiaeth, y trydydd sector a mwy i godi ymwybyddiaeth o arwyddion ecsbloetiaeth sy’n gysylltiedig â llinellau cyffuriau. 

“Gellir galw llawer o’r hyn rydyn ni’n gweithio i fynd i’r afael ag ef yn ‘niwed cudd’, ac mae angen i’r cyhoedd a’n partneriaid barhau i leisio eu pryderon fel y gallwn weithredu’n gymesur ac yn briodol i dargedu troseddwyr a diogelu pobl mewn angen.”