Ffatrioedd canabis wedi’u darganfod ym Mlaenau Gwent

Gweithredodd swyddogion ddwy warant mewn eiddo yng Nglynebwy a Llanhiledd a darganfod mwy na 130 o blanhigion ar draws y ddau safle.

Atafaelwyd mwy na 130 o blanhigion canabis gan swyddogion a oedd yn gweithredu gwarantau mewn dwy dref ym Mlaenau Gwent.

Gweithredwyd y ddwy warant, dan Ddeddf Camddefnyddio Cyffuriau, yn Nheras Pen y Bryn, Glynebwy, ddydd Mawrth 26 Medi ac wedyn yn Stryd Ddol, Llanhiledd, ddydd Mawrth 3 Hydref.

Roedd y ffatri yng Nglynebwy yn ymestyn dros bum ystafell ar ddau lawr a oedd yn cynnwys dros 70 o blanhigion, ac atafaelwyd 60 planhigyn arall o’r cyfeiriad yn Llanhiledd wythnos yn ddiweddarach.

Yn ogystal â’r planhigion, cymerodd swyddogion o dîm plismona cymdogaeth Blaenau Gwent gyfarpar tyfu canabis o’r cyfeiriadau hefyd.

Glynebwy.

Meddai Rhingyll Martyn Pugh:

“Credir mai tua £125,000 oedd gwerth y canabis a atafaelwyd ar draws y ddwy ffatri ac mae’n ymddangos bod y ffatrïoedd yma wedi hen sefydlu ac yn gweithredu ar raddfa ddiwydiannol.

“Mae’n drosedd o hyd i feddu ar, tyfu, dosbarthu neu werthu canabis, a gellir teimlo effaith y cyffur yma mewn gwahanol ffyrdd yn ein cymunedau gan ei fod yn gallu arwain at weithgarwch troseddol arall, fel dwyn.

"Mae’r gwarantau yma’n dangos ein hymrwymiad parhaus i amddiffyn ein cymunedau rhag effeithiau niweidiol cyffuriau anghyfreithlon, sy’n gallu arwain at fwy o ofid yn ein trefi, dinasoedd a phentrefi.

“Bydd ein swyddogion yn parhau i weithio’n galed i gasglu gwybodaeth a chynnal ymgyrchoedd i fynd i’r afael â chyflenwi cyffuriau yn ein cymunedau.

Mae’r wybodaeth mae’r cyhoedd yn ei rhannu gyda ni yn werthfawr iawn a bydd yn ein galluogi ni i ddatgymalu ffatrïoedd eraill yn y dyfodol.

"Mae ein hymchwiliadau’n parhau, ond os oes gennych chi unrhyw wybodaeth a allai helpu ein hymholiadau, neu bryderon am weithgarwch amheus neu anarferol yn eich ardal, cysylltwch â ni."

Ffoniwch ni ar 101, neu anfonwch neges uniongyrchol atom ni ar ein sianeli cyfryngau cymdeithasol, gan grybwyll rhifau cofnod 2300327020 a 2300335514. 

Fel arall, gallwch gysylltu â Crimestoppers yn ddienw gyda gwybodaeth ar 0800 555 111 neu ar eu gwefan.

Llanhiledd.