Dau fachgen wedi’u hanafu gan dân gwyllt yn Hengoed

Mae un bachgen yn dal i dderbyn triniaeth yn yr ysbyty a chafodd y llall ei ryddhau o’r ysbyty ddydd Mercher 4 Hydref.

Cawsom adroddiad am argyfwng meddygol yn Heol Hengoed, Hengoed, tua 2.15pm ddydd Sul 1 Hydref.

Aethpwyd â dau fachgen i’r ysbyty i gael triniaeth am anafiadau y credir eu bod yn gysylltiedig â ffrwydrad tân gwyllt.

Mae bachgen naw oed o ardal Cefn Hengoed yn yr ysbyty ym Mryste o hyd, lle mae’n parhau i gael triniaeth, ac mae mewn cyflwr sefydlog.

Rhyddhawyd bachgen wyth oed o ardal Hengoed o’r ysbyty ddydd Mercher 4 Hydref ar ôl iddo ddioddef anafiadau i’w wyneb.

Meddau Uwch-arolygydd Mike Richards:

“Mae ein swyddogion wedi siarad a llawer o bobl yn barod yn rhan o’n hymholiadau ac mae’r gwaith yma’n parhau.

“Rydyn ni’n gobeithio o fewn y dyddiau nesaf y byddwn wedi siarad â’r ddau fachgen, gan sicrhau eu bod nhw’n barod i siarad â’n swyddogion gyda chefnogaeth a chydweithrediad llawn eu teuluoedd.

“Mae’r gymuned wedi rhannu llawer o wybodaeth gyda ni ac rydyn ni’n ddiolchgar i bawb sydd wedi cysylltu â ni gyda gwybodaeth hyd yn hyn.

“Rydyn ni wedi edrych ar y manylion yma ac wedi canfod bod rhywfaint o’r wybodaeth a roddwyd i ni yn anghywir.

“Mae llawer o ddyfalu ynghylch beth sydd wedi digwydd, felly gofynnwn i bobl beidio â gwneud sylwadau am y mater yma ar gyfryngau cymdeithasol gan fod rhai o’r sylwadau yma’n ddiwerth ac yn rhoi pobl ddiniwed yn ein cymunedau, gan gynnwys plant a phobl ifanc, mewn perygl o niwed.

“Rydyn ni eisiau deall beth ddigwyddodd yn Hengoed a arweiniodd, yn anffodus, at anafiadau sylweddol i ddau fachgen yn ogystal â llawer o boen emosiynol i’w teuluoedd a’u ffrindiau.”

Gofynnwn i unrhyw un â gwybodaeth ffonio 101 neu anfon neges uniongyrchol atom ni ar gyfryngau cymdeithasol, gan grybwyll rhif cofnod 2300332856.